Ministru Justisa, Sergio Hornai informa, parte governu nian entrega ona lista prizioneiru ne’ebé atu hetan indultu ba Prezidente Republika.
“Kona-ba komutasaun pena no mós indultu, hanesan Ministru Justisa hato'o ona mai iha Prezidente Repúblika, liu-liu husi Primeiru Ministru hato'o ona mai iha Prezidente Repúblika, no governu hato'o ona, no sei konklui buat balun bele hato'o mai iha Prezidente Repúblika no Prezidente Repúblika rasik halo desizaun,” dehan Ministru ne’e hafoin hasoru-malu ho PR Horta, iha Palasiu Prezidensia Bairo-pite, Segunda (12/05).
Tuir nia, indultu no komutasaun pena ne'e kabe ba kompeténsia Prezidente Repúblika nian, depende ba prizioneiru sira0nia relatóriu ne'ebé mai husi sira-nia família, prizaun ka husi entidade sira, konforme lei indultu no komutasaun pena.
"Ita iha purvolta 38 lista ne'ebé iha ne'ebá, poderser inklui mós iha Eis padre Ricardo Dascbak, ita bele haree, maibé purvolta 38 pesoas rekuzus ne'ebé merese atu bele hetan indultu no mós komutasaun pena. Maibé ne'e kompeténsia, dala ida tan, ne'e kompeténsia Prezidente Repúblika ninian, ami apenas providensia de'it."
Kona-ba eis Padre Daschbach, Ministru ne’e la fó serteza, maibé hatete de’it katak: “Se nia koondenadu, nia priense rekezitu sira, karik nia idade avansadu, entaun ita labele halo pena perpetua, prizaun perpetua ba ema ida.”
“Prezidente Repúblika iha hanoin rasik kona-ba ida ne'e, ita fó lista sira ne'e hotu, la'ós atu sira… mais Prezidente Repúblika ho Primeiru Ministru hanesan Xefe Governu pondera ba buat hotu-hotu ne'ebé mai husi preokupasaun sosiadade, no kada rekuzus ida ninia kondisaun ka nia komportamentu sira," dehan Ministru Justisa ne’e.
Molok ne’e, Prezidente Repúblika, José Ramos Horta hatete, nia simu ona lista indultu, maibé nia sei konsulta ho Igreja, sosiédade sivil, hafoin mak halo desizaun molok 20 Maiu.
"Ha'u seidauk haree lista definitiva. Orsida ha'u haree. Purtantu, indultu ne'e só ba loron 20 Maiu ne'e. Purtantu, la'ós urjente liu. Purtantu, ha'u sei haree. Lista mai ona husi governu, ha'u sei konsulta ho Igreja, sosiédade sivil, depois mak halo desizaun antes 20 Maiu. Mais indultu ne'e relasionadu ho 20 Maiu," dehan PR Horta iha 28 Abril ne’e.
Entretantu, iha 21 Dezembru 2021, Tribunal Oekusse hasai desizaun hodi kondena prizaun tinan 12 ba Padre Richard Dascbach.
Tribunal Oekusse foti desizaun ne’e hafoin prosesu naruk ne’ebé la’o kuaze tinan tolu (3) nia laran.
Eis Padre ne’e kondenadu ba kazu abuzu seksuál ba labarik ho agravasaun, violénsia doméstika, no pornografia infantil.
