Prezidente Bankada FRETILIN Francisco Miranda Branco hateten, lider maximu FRETILIN no PD hasoru malu laiha senáriu espesiál ida.

“Senáriu úniku mak ne’e hamutuk ita atu dezenvolve Timor-Leste halo oinsá loos atu halo rekoperasaun ekonómika, tanba momentu situasaun globál ida agora ne’ebé nasaun hotu-hotu sofre ekonómia,” dehan Deputadu Branco, iha Parlamentu Nasionál, Sesta (09/10).

Nia dehan, situasaun globál iha mundu ne’e afetadu tebes Timor-Leste, tanba tinan barak ona moris de’it ho setór petrolíferu,  tanba ne’e agora hanoin hamutuk oinsá atu hakaat ba oin,  tanba durante-ne’e Timor-Leste husik liu setór produtivu  hanesan agrikultura nune’e mós haluha setór edukasaun, setór saúde no setór turízmu nian.

“Ajenda horisehik ne’e lideransa partidu rua ne’e ko’alia kona-ba ida-ne’e,” dehan nia.

Kona-ba Partidu Demokrátiku (PD) atu involve mós iha Oitavu Governu, nia dehan, ida-ne’e labele husu mai Bankada FRETILIN, maibé husu ba Primeiru Ministru Taur Matan Ruak.

Nune’e mós lider Máximu Partidu Demokrátiku (PD) hasoru  Sekretáriu Jerál FRETILIN, Marí Alkatiri, nia parte  seidauk hatene, tanba foin hare’e husi média.

“Sinál  di’ak kuandu ita hotu-hotu iha intendimentu, tanba ita hotu-hotu moris iha uma lulik ida de’it katak Repúblika Demokratiku Timor-Leste nia mahon. Atu opozisaun ka la opozisaun mós ita mesak maun alin de’it, ami-nia polítika dehan bele opozisaun, mais opozisaun la’ós atu fila kotuk ba malu. Tanba ita-nia objetivu mak dezenvolve nasaun no ita-nia povu,  tanba ne’e diálogu mai ami importante tebes,” nia informa.