Responsavel Irmas Missionarias Dominicanas do Rosario iha Timor-Leste, Madre Flavia Mendonca konfesa katak, labarik orfanatu hamutuk 31 ne’e hetan defikulidade ba aihan, tanba hafoin Timor-Leste enfrenta situasaun pandemia Covid-19 seidauk hetan apoiu husi Governu.

Irmas Missionarias Dominicanas do Rosario ne’e nia misaun mak habelar Evangelizasaun Kristu nian no tau matan mos ba labarik orfanato sira. Ho misaun ida ne’e mak durante ne’e tau matan hela ba oan ki’ak sira ne’ebé presija hetan tulun.

"Dormotorio Irmas Dominican ida ne’e tau matan ba oan kiak sira hamutuk 31 pesoas, labarik sira ne’e  kuaze mai husi munisipio 13 desde 2015 ate agora,"dehan Madre Mendonsa iha Bidau Mota Klaran ba Online INDEPENDENTE, Terca ohin.

Irma ne’e dehan, sira hetan difikuldade kona-ba osan no hahan hodi fó han ba labarik orfanato sira, relasiona ho pandemia Covid-19 afeita ba doasaun husi Centru Kongregasaun iha Italia.

“Centru Kongregasaun iha Italia tarde hodi transfere Osan mai atu fasilita hodi sosa hahan no nesidade seluk hodi tau matan nafatin ba orfanato labarik feto hirak ne’e dala ruma ai mos araska tiha tanba ohin loron mundu hotu hotu enfrenta Covid -19 tanba ne’e buat hotu hotu ladun lao tuir hanesan uluk”.

Maski nunee, Irma ne’e hateten sei la tané liman ba Governu hodi husu ajuda atu tau matan ba labarik oan kiak sira.

Irma hateten tuir lolos la presiza husu apoiu ba Governu, maibé Governu rasik mak tenki hanoin katak labarik sira ne’e futuru nasaun nian. Desde hahú tinan 2015 too agora labarik orfanatu ne’e seidauk hetan apoiu ruma husi Governu liu husi Ministerio Sosial Solidaridade no Inclusaun (MSSI).

"MSSI iha fulan hirak liu ba mai visita ami, rekolla dadus labarik orfanatu sira nian, dehan hodi ajuda, maibé ami hein ba hein ajudasaun husi MSSI nunka mosu,"dehan Irma.

"Ami rona haree husi RTTL katak ema individu, kompania barak mak halo karitativa ba ema kbiit laek sira maibe ami nunka hetan ajudus ruma husi sese de’it inkluindo karitativa ne’ebé hala’o husi Irmao Xanana moó ami la hetan hotu, afinal Xanana mai iha Bidau maibé fahe de’it iha sorin no nia la tama mai iha Dormotorio ida ne’e, maibé tuir lolos asaun karitativa ka subsidi hanesan ne’e labarik sira ne’ebé hela iha Dormotorio ida ne’e merese simu tanba sira ema oan kiak,"dehan Irma Mendonsa.

Labarik feto Orfonatu sira ne’e maiorio sei eskola iha nivel basika, na’in rua iha UNTL, balu iha nivel pre-sekundaria no sekundaria.

Aliende apoiu karitativa husi ema individu no grupu, Governu mós liu husi Ministério Sosial Solidaridade no Inclusaun (MSSI) apoiu ona osan hamutuk rihun US$ 115,725.92, husi orsamentu doadesimu ba fulan-Fevereiru 2020, nuudar item subvensaun publika hodi apoiu ba organizasaun sosial iha teritoriu Timor-Leste.

Mesmu nunee, Irmas Missionarias Dominicanas do Rosario iha Bidau Mota klaran ne’e la hetan apoiu husi Governu.