Primeiru Ministru, Mari Alkatiri hateten, Governu iha interese atu lori programa anotada ba Uma Fukun hodi aprezenta ba deputadu sira. Ne’e duni, husu ba AMP tenke dada uluk mosaun sensura atu bele iha dalan diskute programa ne’e.

Nia dehan, programa VII Governu seidauk ba PN tanba de'it mosaun sensura, bainhira mosaun sensura mak la dada programa rasik sei la avansa.

“Programa ne’e sai prioridade Governu nian. Bainhira eleisaun antesipada no iha entendementu ba ami koligasaun atu ukun, programa ne’e mak sai baze ba ami atu kontinua”, dehan nia, bainhira halo diálogu ho autoridade lokál, iha salaun Parokiál, Gleno-Ermera, Sesta (12/1).

Nia dehan, programa ne’e rasik hetan ona aprovasaun husi enkontru Konsellu Ministru hein lori de'it ba, maibé deputadu sira husi AMP sira tenke dada mosaun sensura.

Xefe Governu dehan, bainhira mosu eleisaun antesipada maka povu fó konfiansa ba koligasaun (FRETILIN-PD) hodi hetan maioria, programa ne’e sei la muda, tanba baze fundamentál programa ne’e rezolve liu ba povu nia moris.