Husi kritériu hirak ne’e kona-ba membru governu, Sekjer FRETILIN dehan, tenke iha kompeténsia (méritu) atu tuur iha kadeira ne'ebé povu entrega ba nia. Membru sira sei depende ba xefe ida maka primeiru ministru.
Nune’e, Alkatiri mós garante katak, VII Governu Konstitusional sei tuir dalan inkluzaun ampla (nakloke) ba halibur ema hotu-hotu ne’ebé hakarak serve povu tomak.
“Governu sempre defende polítika inkluzaun nasionál no unidade nasionál”, hakerek Sekjer FRETILIN, Mari Alkatiri, liu husi média sosiál.
Governu mós sei halo dezenvolvimentu ne’ebé hodi bele hamenus diferensa entre sidade (villa) no rurál.
Formatu no estrutura seidauk define klaramente, maibé Comissão Politica Nacional (CPN) partidu FRETILIN sei halo diskusaun hodi bele foti desizaun ruma kona-ba figura ne’ebé atu ba primeiru ministru.
Tuir planu, desizaun kona-ba xefe governu no estrutura sira posibilidade sei fó sai iha Segunda (21/8), iha momentu Deputadu Parlamentu Nasionál foun sira simu pose.
Husi partidu aliadu sira hanesan Partidu Libertasaun Populár (PLP) rasik seidauk deklara kona-ba poténsia ba pasta xefe governu nian, maibé partidu KHUNTO rasik fó sai katak sira apoiu Mari Alkatiri ba Primeiru Ministru.
KHUNTO Prontu Koliga
Abertamente partidu KHUNTO deklara prontu atu koliga ho FRETILIN tanba hakarak atu realiza programa polítika iha kompromisu eleitorál partidu nian.
Konselleiru partidu KHUNTO, José dos Santos ‘Naimori’ hateten, KHUNTO foti dalan ba koligasaun tanba hakarak atu garante estabilidade nasionál hodi lori povu sai husi kiak no mukit ba moris prósperu.
Iha fatin hanesan, Sekretáriu Jerál FRETILIN, Mari Alkatiri hatete, enkontru ne’e seidauk kolia kona-ba kompozisaun kadeira iha governu tanba sei simplifika governu boot ba governasaun ne’ebé ki’ik.
Nia esplika, atu garante estabilidade governativa partidu mais votadu sei la’o hamutuk ho PLP no KHUNTO hodi halo koligasaun.
Partidu tolu ne’e sai hanesan uma kain ida, maibé la taka dalan mós ba partidu rua seluk hanesan PD no CNRT atu bele envolve-aan iha governasaun.
“Odamatan no janela nakloke ba sira seluk”, dehan Alkatiri iha Hotel Novo Turismo, horisehik.
Hafoin eleisaun lejizlativa no hetan aseitasaun husi Tribunál Rekursu, Sekretáriu Jerál FRETILIN, Mari Alkatiri no Presidente CNRT, Xanana Gusmão seidauk hasoru malu hodi ko’alia kona-ba formasaun VII Governu.
“Ha’u ho ha'u nia kompadre Xanana ami hasoru malu ona, maibé Sekretáriu Jerál FRETILIN no Prezidente Partidu CNRT seidauk hasoru malu to’o agora”, dehan Alkatiri.
Posibilidade Simu PD
Kona-ba karta ofisial husi Partidu Demokrátiku (PD) atu reuni fila-fali hodi ko’alia kona-ba formasaun VII, Alkatiri hatete, FRETILIN mós halo ona karta ba sira atu bele mai hamutuk hodi bele ko’alia di'ak liután ba asuntu ne’e.
Iha prinsípiu deklarasaun antes ne’ebé partidu mais votadu ne’e halo katak nakloke nafatin hodi bele simu partidu sira seluk ne’ebé hakarak halai hamutuk.
