Téknikamente Forsa Naval hosi Estadu Unidu Amérika (EUA) mak halo konstrusaun no oras ne’e sei kontinua hela.

Diretor eskola, Tito Almeida, hateten Sala-de-aula haat iha eskola ne’ebé sira kontinua halo konstrusaun ne’e ho orsamentu hamutuk $350.000.

“Konstrusaun hahú husi fulan Janeiru no sei remata iha fulan Dezembru, maibé ita sei hare’e lai ba situasaun Covid-19,” Tito Almeida hateten via telephone, Sábadu (11/09).

Durante ne’e totál sala-de-aula iha eskola ne’e hamutuk 20, ho ida-ne’e sira halo konstrusaun tan ba sala de aula hamutuk haat ne’ebé sei kompleta sala 24, maibé ida ne’e mós konsidera seidauk sufisiente nafatin tanba  númeru estudante kontinua aumenta kada tinan.

Totál estudante iha tinan ne’e hamutuk 1.003, kompostu husi primeiru anu to’o terseiru anu.

Ho númeru ne’e, parte eskola husu Governu bele aumenta tan sala aula to’o 56 atu nune’e sala aula hamutuk 80, hodi bele akumula estudante sir abele tuir prossesu aprendijazem iha dader hotu.

Kona-bá ne’e, Diretór Serbisu Edukasaun Munisipiu Baucau, Augusto Hornai, hateten, bazeia ba planu konstrusaun ne’e, Serbisu Edukasaun  Baucau hamutuk ho Autoridade munisipál, iha ona planu atu implementa projetu infraestrutura edukasaun iha tinan ne’e.

“Tinan ne’e ami hetan projeitu  konstrusaun 30 iha munisipiu Baucau, tanba iha tinan 2020 ami iha ona planu no aprezenta ona ba iha MEJD, maibé ho situasaun Covid-19, no iha fulan abril no maiu atu realiza la konsege nafatin ho ida ne’e agora dadaun ita foin mak iha planu hodi realiza,” nia dehan.

Bainhira halo aprovasaun ba implementasaun projeitu ne’e rasik, Serbisu Edukasaun Munisipiu Dili sei kria grupu, hodi loke konta bankária, nune’e halo implementasun ba projetu ida ne’e.

Projeitu ida ne’e sei halo konstrusaun ba sala de aula hamutuk 98 no kada eskola sei hari’i sala de aula rua no másimu sei to’o sala de aula neen, no eskola sira ne’e sei hari’i iha postu-administrativu Baucau Vila, Venilale, Kelikai, Laga no Baguia.