Konsellu Ministrus aprova proposta ne'e tuir projetu ne’ebé aprezenta husi Ministru Obras Públikas (MOP) Abel Pires da Silva, delibera ona atu fó autorizasaun ba prosedimentu aprovizionamentu ho tipu Konkursu Públiku Internasionál no ba ninia despeza plurianuál ba obra públika projetu konstrusaun ponte foun ho estrutura metálika Mota Komoro Ulun (Kasnafar).
"Konsellu Ministru mós aprova proposta ne'ebé aprezenta husi Ministru Obras Públiku kona-ba autorizasaun ba prosedimetu aprovizionamentu ho tipu Konkursu Públiku internasionál no nia despeza ba plurianual ba Obra Públika projetu konstrusaun ba ponte foun ho estrutura metalika ka estrutura besi iha mota komoto ulun Kasnafar, ita boot sira hotu mós akopaña," dehan Ministru Prezidensia Konsellu Ministru (MPKM) Fidelis Manuel Leite Magalhaes hafoin reuniaun KM hotu iha Palásiu Governu, Sesta (04/11).
Nia dehan, mota ne'e tinan hirak liu ba lori ema no mota ne'e tinan-tinan kontinua sai hanesan inpedimentu ida ba transporta Públiku entre nasionál Dili ho Munisípiu sira, liu-liu Munisípiu hirak ne'ebé hanesan Aileu, Ainaru, Manufahi no Kovalima.
Tan ne'e mak Governu deside atu avansa ho konstrusaun ba ponte ida ne'e, no ponte ne'e rasik sei halo hotu ho besi, nune'e bele garantia tempu udan labele afeita ba movimentu Públiku, tanba estrada liga nasionál Dili entre Munisípiu sira.
Orsamentu ne'ebé prevee ba projetu ida ne'e ho ninia montante totál U$ 8.9 milloens hodi halo konstrusaun ba ponte ne'e rasik, tanba dala barak mota ne'e sempre fó impaktu iha tempu udan.
Entretantu, iha 19 Outubru 2022 Ministru Obras Públikas (MOP), Abel Pires da Silva, asina ona kontratu ho kompañia manán na’in sira kona-ba projetu konstrusaun ba moru protesaun mota husi Manlauanna to’o mota Kasnafar ne’ebé hetan estragus iha kalamidade 4 Abril 2021, no projetu tau aspalt ba estrada husi Fatisi (bee tudak) nian ba to’o Sarlala ne’ebé daudauk ne’e hahú ona prosesu konstrusaun.
“Asina tiha ona kontratu, ida husi Manleuanna ba mota Kasnafar ne’e ha’u asina ona kontratu, ha’u haluha sira-nia naran maibé kompañia tolu mak manán, ne’e husi Manleuann to’o mota Kasnafar, ne’ebé semana oin ka semana ne’e sira halo ona. Parte Sarlala nian leten ita atu nahe aspalt ne’e semana ne’e sira hahú tiha ona mais semana oin ha’u sei ba halo inspesaun ba iha neeba entaun tau aspalt husi Sarlala mai besik Fatisi (Bee tudak nian) besik air terjun nian ne’e,” dehan, Ministru Obras Públika iha Palásiu Governu hafoin reuniaun Konsellu Ministru.
Ministru hatutan projetu sira ne’e kompañia manán na’in sira mak sei implementa, ba estrada husi bee tudak Fatisi nian tuun mai kraik to’o mota Kasnafar ne’e sei loke tan tenderizasaun, konstrusaun estrada ne’e sei kompleta mós ho mota Kasnafar.
“Projetu ne’e ida manán mak sei halo, depois tender ba ida kraik ne’e, depois ponte tan ne’e kompleta ona, hadi’ak tan iha fatin sira ne’ebé naksobu ne’e, ne’e ha’u hanoin parte oan neeba ne’e di’ak ona. Segunda (17/10/2022) ne’e ha’u asina ona (projetu konstrusaun ba moru protesaun husi Manleuanna to’o mota Kasnafar), tuir loloos Sesta mais kontratu mai tarde husi CNA (Komisaun Nasionál Aprovizionamentu) entaun iha segunda dader ne’e mak asina, depois ita intrega kedas ba kompañia sira para bele hala’o obra ne’e,” Ministru esplika.
