Prezidente Konsellu Imprensa, Virgílio Guterres, konsidera ezbosu projetu lei ne’e hanesan atake ba Liberdade espresaun, tanba buka atu kriminaliza sidadaun sira ne’ebé hato’o sira-nia espresaun no kritika hasoru governu.

Nu’udar estadu demokrátiku sidadaun hotu iha direitu hato’o nia opiniaun liuhusi meiu saida de'it ba asuntu ne’ebé relasiona ho ninia moris.

Tanba ne’e, tuir nia, alterasaun ne’e kontra konstituisaun, tanba iha artigu 9 Konstituisaun RDTL katak, orden jurídika TL adopta prinsípiu direitu internasionál jerál ne'ebé la'ós ratifika de'it prinsípiu konvensaun kona-ba direitu polítiku sivíl, maibé adopta mós prinsípiu sira ne’e hanesan orden jurídiku internu nian.

“Tentativa ne’ebé ministériu justisa foti kontra ita-nia konstituisaun, kontra mós prinsípiu internasionál sira,” dehan Virgílio, iha knaar fatin, Kintál Boot, horisehik.

Nia hatutan, alterasaun ne’ebé governu hakarak halo laiha objetivu klaru, maibé antes ne’e governu hato’o ona preokupasaun kona-ba informasaun no identidade falsu iha rede sosiál.

Ne’e duni, bainhira governu preokupa ho média sosiál maka bele hamosu fali lei seluk tanba lei cyber crime ka sibernétika, la’ós liuhusi alterasaun lei difamasaun.

Tanba ne’e, loloos Governu servisu hamutuk ho ministériu públiku atu elabora lei sibernétika, tanba liuhusi ne'ebá mak bele haree ema sira ne’ebé halo diskursu ódiu uza meius sibernétika hodi envolve tráfiku umanu, pornografia no ID falsu, la'ós uza lei difamasaun.

FONGTIL Rejeita Kriminaliza Difamasaun

Forum Organizasaun Naun Governamentál Timor Leste (FONGTIL) rejeita totál planu governu atu altera lei difamasaun hodi kriminaliza ema ruma atu espresa opiniaun ka kritika ba ema ka organizasaun seluk.

“Ami rejeita totál alterasaun ida ne’e no ami la aseita. FONGTIL mai ho pensamentu ida katak ita iha lei natoon ona ne’ebé regula kona-ba liberdade espresaun lei demonstrasaun limite tiha ona liberdade balun,” dehan Diretór Ezekutivu FONGTIL, Daniel Santos do Carmo, iha knaar fatin, Kaikoli, horisehik.

Nia hatutan, Lei Komunikasaun Sosiál limite ona kódigu sivíl mós ko’alia kona-ba oinsá maka atu kriminaliza difamasaun, ne’ebé la presiza atu kriminaliza tan.

Nia dehan, membru governu labele halo sira aan hanesan Santu. Bainhira asume responsabilidade hanesan ukun tenke prontu simu konsekuénsia hotu.