Tuir Ministru Prezidensia Konsellu Ministru, Fidelis Leite Magalhães hatete, ba ema hotu ne’ebé oras ne’e daudaun iha hela Munisípiu Dili, nafatin hela iha ida-idak nia uma ka iha sira nia alojamentu temporáriu, hahú husi oras 00:00 loron 30 fulan-abril tinan 2021 to’o oras 23:59 loron 13 fulan-maiu tinan 2021.

Iha rezolusaun ne’e, bandu atu hala’o atividade selebrasaun relijioza ne’ebé implika ezisténsia ema halibur-malu.

Ba efeitu Rezolusaun Governu nian ne’e, konsidera nu’udar ema halibur-malu maka ema liu husi na’in rua halibur malu menus husi metru rua entre sira.

Bandu atu organiza no hala’o serimónia funerál nian iha ne’ebé ema liu na’in sanulu maka partisipa. Ema ne’ebé partisipa iha serimónia ne’e tenke uza máskara hodi taka inus no ibun, no mantein distánsia pelumenus metru ida ho ema seluk ne’ebé partisipa iha serimónia ne’e.

“Autoridade polisiál nian sira fiskaliza kumprimentu ba regra sira ne’ebé hatuur ona iha Rezolusaun Governu nian ne’e no aviza infratór sira katak se sira kontinua nafatin hodi la kumpre ba Rezolusaun ne’e, bele konsidera prátika ba krime dezobediénsia nian ida,”dehan Ministru Fidelis.

Tanba ne’e, autoridade polisiál sira sei komunika ba Ministériu Públiku identidade husi ema ne’ebé, hafoin avizu ne’ebé prevee iha fraze anteriór, kontinua la respeita regra sira ne’ebé prevee ona iha Rezolusaun Governu ne’e nian.

“Karik regra sira ne’ebé prevee iha Rezolusaun Governu ne’e nian ema husi rai-li’ur maka la respeita, autoridade polisiál sira sei komunika sira nia identidade ba Servisu Migrasaun”.

Númeru kazu Covid-19 kada loron aumenta. Tuir dadus jerál, kuarta (28/4) kazu konfirmadu hamutuk na’in 1104, ho maioria sintomatiku, no ema na’in tolu (3) mate.

Jornalista: Saturnina da Costa

Editor: Jose Sarito Amaral