Enkuantu, Embaixadóra ne’e dehan, Kompañia ida Thomas Foods Internasional ne’e, kompañia ida ne'ebé bo'ot tebes, kada tinan sira halo lukru dolar amerikanu billiaun U$2.

“Kompañia ne’e foku liu ba iha prosesa na’an karau no na’an bibi malae, sira nakloke ba atu investe, maibé kompañia ne'e, sira fokus liu mak atu oinsa lori Timoroan sira ba servisu iha Autralia no ba sira nia kompañia, sira kontente tebes ho vizita ida ne'e," dehan nia iha Palásiu Governu, kinta ne’e, (21/07).

Nia hatutan, iha semana tolu liu ba, Embaixadóra ne’e ba vizita kompañia refere no kompañia ne’e aprezenta sira nia-aan, no iha vontade, hakarak atu rekruta Timoroan ba servisu iha ne’ebá.

Nia dehan, to’o agora seidauk iha Timoroan ida mak servisu iha sira nia fatin, maibé bainhira traballadór sira ba servisu iha Australia, servisu deit iha area kuu aifuan, no kuu modo no seluk tan.

Aleinde, balun ba servisu iha fabrika na’an nian maibé uituan deit, enkuantu iha sira nia fatin seidauk iha Timoroan ida iha ne’ebá.

Tanba ne’e, sira hakarak atu halo rekrutamentu, maibé presiza uluk ema na’in 15 no prosesu rekrutamentu ne'e Embaixadóra Timor-Leste ba Australia hato'o ona ba iha Primeiru Ministru, Taur Matan Ruak.

Entretantu, Embaixadóra ne’e, apelu ba Timoroan sira ne’ebé hetan oportunidade ba servisu iha Australia, atu hatudu komportamentu ne’ebé diak hodi reprezenta duni Estadu Timor-Leste.

Entrentantu, Primeiru Ministru Taur Matan Ruak kontente tebes, primeira vez kompañia bo'ot ida husi Autralia mai halo rekrutamentu ba Timoroan sira hodi servisu.