Diretór Nasionál PSIK, Vicente Fernandes Brito hateten, prosesu akizisaun arma servisu ne’e inisiu 2019. Tanba ne’e, iha Marsu 2020 fornesimentu Kompañia Sodharka husi Portugál sei hatama pistola hamutuk 78.
“Prosesu akizisaun ne’e tuir aprovizionamentu liuhusi Komisaun Nasionál Aprovizionamentu (CNA), tanba orsamentu iha tinan 2019 governu halo ona atribuisaun PSIK atu suporta atividade investigasaun kriminál no atividade prevensaun”, dehan nia, iha knaar fatin, Kaikoli, horisehik.
Nia dehan PSIK hanesan mós polisia ida, bainhira iha mandadu detensaun ba komprimentu pena, iha ezekusaun mandadu ba primeiru interrogatóriu judisiál, presiza arma servisu hanesan polisia, ne’e regra normál.
Nia afirma, iha tinan 2015 to’o agora ne’e PSIK laiha atribuisaun ida, tanba orsamentu 2019 Estadu atribui ona, agora hein ninia realizasaun iha 2020.
Tanba ne’e, prosesu hotu ona hein de’it atu kompañia bele fornese no tipu arma servisu ne’ebé tuir diploma ministeriál hodi suporta atividade sira.
“Arma akizisaun ne’e ita liuhusi kompañia ida ho naran Sodharka husi Portugál hanesan distribuidór, ne’ebé fasilita mós ba polisia judisiáriu Portugál, maibé arma servisu ne’e fabrika ne’e husi Xina,” dehan nia.
Tanba ne’e, laiha impedimentu fulan-Marsu 2020 bele ona mai iha PSIK, maibé arma servisu ne’e tuir trazmutasaun oinsá mak bele atribui ba investidór sira liuhusi teste ruma mak foin to’o iha ne’ebá.
