Prezidente INSS, Longuinhos Armando afirma, INSS hala’o pagamentu ba kompaña privadu, traballadór non-formal sira hahú kedas husi tinan 2020 tuir dadus ne’ebé INSS notifika.

Nia esplika, husi total kompaña privadu ne’ebé hetan ona rekuperasaun ekonomia ho total orsamentu hamutuk $3.489.003.77.

Enkuantu traballadór ba setór non-formal ne’ebé hetan ona pagamentu hamutuk ema na’in 748 ho orsamentu hamutuk $70.093.989.49 no ba despensa kontributivu ho orsamentu $529. 989.49.

Nia argumenta, prosesu pagamentu ba rekuperasaun ekonomika sei kontinua la’o to’o fulan Marsu 2021.

Total orsamentu ne’ebé preve ba rekuperasaun ekonomika hamutuk millaun $42. Orsamentu ne’e apoiu ba kategoria tolu maka hanesan emprejariu (empregadór) ne’ebé rejistu ona iha INSS, traballadór sira no apoiu setór non-formal hanesan ema ne’ebé servisu ba nia an hanesan loke kios.

Bazeia ba dekretu lei nú. 51/2020,14 Outubru kona-ba apoiu retoma manutensaun ba atividade no ambitu ba planu rekuperasaun ekonomia ne’ebé vigora iha teritoriu tomak.

Antes ne’e, Ministra Solidariedade Sosial no Inkluzaun (MSSI), Armanda Berta dos Santos hateten, dekretu lei ne’e aprova medida apoiu ba retoma no manutensaun atividade ne’ebé Governu kria atu garante dezenvolvimentu ekonomia no redus efeitu negativu ba ekonomia, impaktu husi krize sanitaria ne’ebé mosu hodi harahun ekonomia mundiál.

“Tulun hirak ne’e fó ba ema sira ne’ebé iha kondisaun lakon reseita ka volume negosiu no hakarak atu retoma hikás sira nia atividade. Nune’e mós ba sira ne’ebé hakarak kontinua hala’o sira nia atividade mais legalmente la permite, tanba distansiamente obrigatoriu atu hadook an husi pandemia ida ne’e, hanesan ba ajensia viajen, otelaria no restaurante sira,” tenik nia.