Tuir Ministru Ensinu Superior Siensia no Kultura Longuinhos dos Santos hatete, ensinu superior privadu sira atu komesa ona sira nia orientasaun ba estudante fóun, maibé to’o oras ne’e seidauk iha desizaun ida kona-ba kbi’it laek sira atu tama iha instituisaun privada sira.

Tanba ne’e kona-ba rejime hakbi’it, primeiru MESSK sei prepara hela dekretu lei atu regula bolsu estudu iha rai laran, tanba hetan fundus husi governu maibe antes atu realiza tenke prepara lei ida hodi vigór.

“Durante ne’e ita aplika ne’e bolsa estudu ba rai liur entaun lei ne’e vigor liu ba rai liur. Entaun ita mós tenke kria lei ida ne’ebé mak vigor iha ita nia rai laran atu bele sustentabiliza ba ita nia alin estudante sira ne’ebé mak hahú estudu iha rai laran ne’ebé mak hetan benefisiariu husi governu, hanesan kbi’it laek, ne’e hetan fundus husi governu entaun ita tenke kria lei ida ne’ebé mak tenke vigora ba sira”, dehan Ministru MESSK iha palasiu Governu kuarta (10/02/21).

Nia hatutan lei dadaun ne’e halo ona esbosu ne’ebé mak enkamiña ona ba iha Konsellu Ministru (KM), hodi hein de’it kalendarizasaun.

“Dekretu lei ne’e agora ita halo ona esbosu ne’ebé mak ita enkamiña ona mai iha konsellu ministru ita hein de’it kalendarizasaun depois mak ha’u aprezenta”, tenik Ministru.

Iha sorin seluk Reitór Universidade da PAZ Adolmando Amaral haktuir, UNPAZ iha planu atu simu estudante tinan akademiku 2021 hamutuk rihun 3 resin. Nia mós hatutan maske planu UNPAZ nian atu simu estudante rihun 3 maibé la taka dalan ba ema kbi’it laek sira ne’ebé mak atu mai.