Maske iha ona informasaun, maibé nia hatete, nia parte asegura hela ba públiku no ezije ba Governu atu hadia urjente.

“Ami hamutuk ho entidade relevante sira balun simu ona informasaun husi parte migrasaun nian, aguarda hela informasaun kona-ba fronteira nian, ne’ebé la presija alastra ba públiku hatene,” dehan Aderito ba jornalista sira iha Parlamentu Nasional, Kuarta (05/06).

Kazu kazal Timor-oan ne’ebé lori droga no konsege hakat liu alfandega Timor Leste konsege “hamonu” imajen Timor Leste nian, liu-liu ba kapasidade alfandega atu deteta sasan illegal ne’ebé tama no sai. Maske nune’e, kazu ne’e mós fanu governu Timor Leste atu hadi’a di’ak liu tan jestaun fronteira

Hanesan públiku hatene, iha 29 Maiu foin lalais, autoridade Indonezia kaptura kazal Timor-oan ho inisial JSP no AS ne’ebé lori droga iha makina imprime tama ba Indonezia.

Aderito konsidera kazu ne’e mós fanu estadu no governu Timor Leste atu hadi’a no hasa’e liu tan atensaun ba jestaun fronteira.

Tuir Hugo, durante ne’e ajente estadu ne’ebé serbisu iha fronteira la hatudu reponsalblidade no la professional.

Nia afierma, jestaun fronteira tenke halo ho seriu, labele serbisu metade de’it maibé tenke serbisu masimu.

“Presiza halo reforma iha jestaun sira. See de’it mak serbisu iha jestaun fronteira ne’e tenke hatene regras par hotu-hotu bele serbisu ho responsalblidade no professional atu nune’e ba oin labele fó tan dalan ka espasu ema seluk atu aproveita.”

Tanba, deputadu ne’e dehan, rede droga ne’e la serbisu mesak maibé sira mós iha ema atu akompaña movinetu ka efetividade iha jestaun Fronteira.

“Kualker momentu mak jestaun fronteira fraku sira tama kedas. Agora governu mak tenke neon-nain atu haree frakeja sira ne’e”, nia hatete.