Prezidente Komisaun Organizadora ba selebarasaun 12 novembru, Denilson Guteres hatete, komemorasaun masakre Santa Kruz ba dala-34 sei iha atividade prinsipál lima.
“Ita-nia komemorasaun ba tinan ne'e ho atividade prinsipal lima mak, Konsulta Massal ba sobrevivente no familia, Limpeza Jeral ba komemorasaun masakre Santa kruz, kalan reflesaun, missa komemorasaun masakre Santa kruz, no kari aifuna iha Santa kruz,” Informa ba jornalista sira, iha nia kna'ar fatin CNC Balide, Tersa (04/11).
Nia hatete, iha loron-7 fulan ne'e sei iha atividade Konsulta Massal ba sobrevivente no familia sira-ne'ebè mak uluk hetan torturasaun iha masakre Santa Kruz, atu sira bele fahe esperensia no motiva juventude sira agora ligadu ho sira nia luta.
Aleinde ne'e, sei iha mos atividade limpeza jeral iha simiteiru Santa Kruz, tanba antes ne'e iha loron matebian, nune'e ekipa sei halo limpeza.
“Depois iha loron-11 kalan iha simiteiru santa kruz, ita sei iha reflesaun fila-fali ba saudozu Sebastião Gomes nia mate, no iha loron-12 dader ita sei missa iha igreja Motael, depois de missa ita sei halo marsa ba simeteriu Santa kruz hodi kari ai-funan,” Nia informa.
Denilson subliña, husi atividade lima ne'e fundu mai husi Ministériu Juventude, Desportu, Arte no Kultura.
“Husi ita nia atividade lima ne'e, orsamentu mai husi MJDAK hamutuk $19.800 mil, ne'e sei utiliza ba atividade hahu husi loron-7 to'o 12 fulan ne'e ba atividade komemorasaun masakre Santa kruz nian,” Nia afirma.
Nia afirma, tema ba komemorasaun masakre santa kruz tinan ne'e mak, “Ha'u ema timor orgollu ho ha'u nia nasaun”.
"Husi tema ida ne'e ita liga liu ba juventude sira, tanba hanesan ema timor-oan tenke orgullu ho sa'ida mak ita nia inan-aman no juventude sira uluk luta hodi jari ona nasaun ida, Nune'e hanesan juventude jerasaun foun tenke saida mak ita tenke banati tuir hodi halo di'ak ba nasaun ida ne'e,” Kata nia.
Prezidente Komisaun ne'e mos, apela ba juventude sira hotu, atu partisipa masimu iha komemorasaun loron masakre Santa kruz.
“Ha'u hakarak hakarak apela ba maluk sira hotu loron ida ne'e hanesan mos loron ba juventude sira hotu, tanba ne’e husu ita atu partisipa masimu atu bele buka hatene klean liu tan kona-ba istoria masakre 12 novembru ni’an,” Tenik nia.
Iha fatin hanesan, Prezidente Komite 12 Novembru, Filipina Rodrigues Pereira, fiar katak komemorasaun masakre Santa kruz, tinan ne'e bele la’o ho susesu.
"Ha'u fiar katak selebrasaun maskre Santa kruz ba dala-34 iha tinan ne'e, tanba ne’e hau fiar Katak tinan ne'e sei lao ho diak,” Nia afirma.
Prezidente komite 12 Novembru ne’e mos, husu juventude no estudante sira atu hola parta iha loron importante ne’e.
“Tanba ita hatene katak 12 Novembru la’os komemorasaun ba masakre Santa kruz de'it, maibe selebra mos loron juventude nasionál Timor-Leste,” Nia hakotu.
