Iha ambitu lansamentu ne’e, realiza mós komemorasaun loron mundial ba menstruasaun ne’ebé monu iha loron 28 fulan-maio, kada tinan.

Tuir Diretóra PITL, Dillyana Ximenes, hatete, lansamentu ba plataforma ne’e, atu fasilita feto no labarik feto sira atu kuiñese diak liu kona ba saúde reprodutiva.

Nia dehan, labarik feto sira presiza atu tuir edukasaun ba saúde reprodutiva nune’e bele hasa’e kuiñesementu sira nia iha sosiedade nia leet no iha fatin ne’ebé sira hela ba.

Tuir nia, labarik feto ho idade 10 to’o 25 bainhira sira aprende ona kona ba saúde reprodutiva, sira bele ona foti desizaun ba sira nia-aan rasik.

“Labarik feto bele foti desizaun, kona ba sira nia isin lolon, ne’ebé iha realidade katak, ha’u nia isin ho ha’u nia desizaun mak ha’u nia futuru. Ho sentidu ida katak, ha’u lakohi kaben sedu, isin rua sedu,”dehan nia iha Ótel Novu Turizmu, tersa ne’e (31/05).

Nune’e, nia dehan, fó mós espasu ba labarik feto sira atu bele lao tuir desizaun ne’ebé sira foti.

Iha fatin hanesan, Embaixadóra PITL hanesan mós Advokasia ba Impaktu Kaben Sedu, Cidalia Nobre Mouzinho Lopez Guterres, hatete, atividade ba lansamentu ne’e, atu reativa fila fali plataforma online hodi fasilita informasaun kona ba saúde reprodutiva nian.

"Ha'u hanoin katak, ida ne'e parte importante ida, ne'ebé mak Plan Internasional hamutuk ho Parseiru sira, hodi reativa fila-fali, tanba iha tinan tolu liu ba ha'u hola parte iha programa ida ne'e, ha"u hanoin katak importante atu reativa fila-fali,"dehan nia.

Nia hatutan, ho aplikasaun hodi atu hodi haree impaktu negativu husi kaben sedu no isin rua sedu.

Tanba ne’e, nia dehan, programa ne’e importante tebes atu bele hasa’e kuiñesementu labarik feto sira nian kona ba saúde reprodutiva.

Tuir nia, labarik feto foinsa’e sira, tenki partisipa iha formasaun sira relasiona ho saúde reprodutiva, nune’e lao tuir direitu no desizaun nuudar feto.

Nia hateten, ba selebrasaun loron mundial menstruasaun ba feto sira liu husi servisu hamutuk ho PITL no MS hodi fahe informasaun kona ba ijiene mestrusaun ba labarik feto no móis feto foinsa’e sira.

Tuir nia, situasaun ne’ebé labarik feto sira hasoru mak bainhira iha eskola sira laiha fasilidade atu atende ba labarik feto ne’ebé hetan moras feto.

Tanba ne’e, Cidalia, husu ba inan-aman no familia atu bele fó informasaun labarik feto sira ne’ebé ho idade reprodutiva.

Nune’e mós, inan-aman tenki fó informasaun ne’ebé seguru ba oan sira.

Entretantu, Xefe Departamentu Saúde, Silvano Pedro, informa, programa ne’ebé lansa hanesan meius ida hodi apoiu MS liu-liu liga ba atendementu ba adolesente no joven atu iha koñesimentu di'ak no bele halo prevensaun, ba kaben sedu.