Komandante Jerál PNTL, Komisariu Faustino da Costa hatete, autór kazu tentativa ómesidu dadaun ne’e prosesu lao ona no hein de’it nia rejulttadu.

“Asuntu ida ne’e ha’u atu dehan de’it katak dadaun ne’e prosesu lao ona, depois mak bele haree rezultadu,”dehan Komisariu Faustino ba jornalista sira iha konferensia imprensa, iha Quartel Jerál PNTL, Kai-koli, Dili (01/05).

Komandu PNTL ne’e dehan, autór identifka hanesan ajente prinsipal husi Polisia Nasional Timor Leste.

Nia esplika, bainhira tiru vitima laos iha tempu servisu, maibé iha tempu Volga, tanba ne’e sei foti desizaun ida ne’ebé sériu.

“Ha’u dehan tiha ona katak, organika PNTL iha dekretu lei númeru 9/2009  hateten momos ho rejime uza forsa iha dekretu lei númeru 43 ne’ebé internalmente iha instituisaun PNTL hasai regra kona-ba uza fosa, tanba ne’e ha’u sei hola desizaun ida ne’ebé sériu ba kazu tentativa ómesidu ne’e,”dehan nia.

Tuir relatoriu ne’ebé Komandu PNTL simu katak kazu tentativa ómesidu ne’e akontese iha loron 30 fulan-Abril, oras 06:25 lorokraik, iha Suku Vaviquinia, Postu Administrativu Maubara, Munisipiu Likisá.

Komisariu Faustino konta katak, autór uza transporte públiku ho kamioneta ida husi Dili ba Maubara. Too iha Maubara, vitima ho nia kolega balun tuur iha estrada ninin haree autór ne’e halai ho velosidade as, tanba ne’e vitima sira hakilar. Hafoin vitima sira hakilar, maka autór para tiha kareta hodi hakiduk fali ba vitima sira nia fatin mak tiru vitima Isac.

Ho kronolojia akontesimentu ne’e, Komandu PNTL konsidera atuasaun uza kilat iha komunidade nia leet no tiru vitima ne’e krime.

Autór dadaun ne’e detein ona iha sela Komandante Jerál PNTL hodi submete ba prosesu kriminál.

Entretantu, vitima Isac dos Santos sei iha sala operasaun Hospitál Nasionál Guido Valadares Dili ho kondisaun gravé.