Ekipamentu mak hanesan, Fase Mask (N95) hamutuk 100 box, Hand Sanitaizer butir rihun ida, Glasses 150 pcs, Shoes 500 pcs, Corp body bag 100 pcs, Infraded temperature gun 50 pcs, Coverall with hoods 525 pcs, Face Shield 150 pcs.

Orsamentu ne’ebé apoiu husi KOICA hodi sosa ekipamentus sira ne’e hamutuk rihun U$50.

Objetivu husi apoiu ekipamentus ne’e hodi hasoru pandemia Covid-19 no bele sai aspetu ne’ebé importante ba Governu Timor-Leste.

Ekipamentu ne’e to’o Dili liu husi kooperasaun di’ak entre KOICA, CVTL no Embaixada Indonezia. Tanba ne’e KOICA hato’o nia apresiasaun ba parte hotu ne’ebé involve no ajuda ekipamentu sira ne’e to'o iha Timor-Leste ho di’ak no seguru.

Country Director KOICA, Kim Sikhyon, hatete, relasiona ho Covid-19 ne’ebe mosu tan pozitivu ida iha loron 26 fulan-Outubro 2020, mak ekipamentu ne’e importante atu Timor-Leste kontinua halo prevensaun.

Ajensia ne’e agradese ba maluk funsionariu no parte tomak nia esforsu no sakrifisiu ne’ebé halo hanesan lideransa ne’ebé di’ak no sai mós hanesan testamuñu ba krize ida ne’e la’o ho di’ak no hakmatek iha krize no livre husi Covid-19.

"Ita labele hamrik de’it, maibé ita tenki alerta hodi kombate virus ida ne’e, nune’e ita hotu rona ona informasaun katak virus ataka ba daruak nian espalla ona iha Uniaun Europeia, Amerika nomos nasaun Aziatiku sira seluk ne’ebé afeita ema barak sai vitima nomos fila fali ba estadu emerjensia hodi bele asegura ba seguransa ba moras no ekonomia sosial," dehan nia, iha salaun SEPS, hafoin ofisialemente entrega ekipamentu ne’e.

KOICA iha konsiderasaun ba aspetu hotu, nune’e husu atu labele halimar, maibé tenki tau atensaun hodi hasoru dezafiu ne’ebé boot liu tan sei mai.

Tanba tuir Kim katak, atu mana funu (virus) tenki iha preparasaun di’ak no hetan dame.

"Ha'u espera ida ne’e hanesan prezente ida husi ema Korea atu haforsa liután amizade entre nasaun rua hodi luta hasoru Covid-19 iha tempu tuir mai." nia dehan

Iha fatin hanesan, Sekretariu Estadu SEPS, Joaquim José Gusmão dos Reis Martins, hatete, Governu iha polítika ida ne’ebé di’ak hodi satan ba moras Covid-19 iha Timor-Leste.

"Agradese ba maromak no ita nia lulik sira, no agradese mós ba CVTL bele konsege hola ekipamentu sira ne’e ho nune’e ita bele proteze husi moras ida ne’e," dehan nia.

Ekipamentu sira ne’e sei fahe ba diresaun sira no halo mós prevensaun ba iha komunidade sira.