Apoiu orsamentu ne’e liu husi serimonia asina akordu entre Governu Timor-Leste ho Ajensia Internationál KOICA, tersa ohin, iha salaun Protesaun Sivíl, Kaikoli Dili.

Sekretáriu Estadu Protesaun Sivíl (SEPS), Alexandrino Xavier de Araujo hatete, KOICA apoiu orsamentu hamutuk rihun $50 ba povu Timor hodi uza ba prevensaun Corona Virus (COVID-19).

Orsamentu ne’ebé KOICA apoia ne’e atu sosa ekipamentu protesaun pesoal COVID-19 nian ba ekipa protesaun sivil hodi halo prevensaun ba surtu ne’e.

Maski nunne, ho frankamente SEPS rekoñese laiha esperensia atu halo akizasaun, tanba ne’e atu sosa ekipamentu liu husi parseiru CVTL.

SEPS hatutan, osamentu ne’e transfere direta husi KOICA ba konta bankaria CVTL nian hodi sosa ekipamuntus hirak ne’e ba Protesaun Civil.

“Ha’u lori Governu no povu tomak nia naran agradese ba ajensia KOICA ne’ebé iha sentimentu no solidariedade mai ami nia povu iha rai ida ne’e,”dehan nia, hafoin seremonia asina akordu.

Governante ne’e dehan, prosesu kona-ba sosa ekipamentu ne’e, parte SEPS ho Sekretariu Jerál CVTL, halo ona akordu transferensia direita osan rihun $50 ba CVTL.

Ekipamentu ne’ebé sei sosa maka hanesan maskra, hand sanitazer no mós sasan salvamentu ba material kimika ho salvamentu ba mate isin no seluk tan.

SEPS agradese ba KOICA nia apoiu mai Governu liu husi Protesaun Sivíl.