Projetu husi Dekretu-Lei ne’e sai ona hanesan objetu deliberasaun iha Konsellu Ministrus nian iha 25 Maiu 2022, maibé iha alterasaun balun iha faze redasaun finál nian, presiza submete ba deliberasaun foun.
"Konsellu Ministru aprova fila-fali projetu dekretu lei ba alterasaun orgánika PNTL nian, projetu ne'e iha Tempu liu ba maibé prosesu ne'e la’o hela iha komentariu sira redasaun nian," dehan Ministru Prezidensia Konsellu Ministru (MPKM), Fidelis Magalhães, iha Palasiu Governu, horisehik.
Nia dehan, iha substansia mak iha karakter polítika no la'os de'it karakter téknika ba redasaun nian, konforme prátika baibain abitual tenke mai fali desizaun deliberasaun Konsellu Ministru nian.
Ne'e mak Ministru Interior submete fila-fali mai konsellu Ministru no Konsellu Ministru reapresia fila-fali no Aprova proposta ida ne'e ba orgánika PNTL ninian.
Ne'e mudansa liuliu ba iha artikulasaun sira kona-ba Komandu nian ida ne'e mak ohin atu halo di'ak liu tan parte artikulasaun iha Dekretu Lei nian para reflete di'ak liu tan komprensaun ba ninia substansia esensial sira.
