Ministru Prezidensia Konsellu Ministru, Fidelis Leite Magalhaes informa, iha semana kotuk KM aprova ona alterasaun dahuluk ba dekretu lei númeru 37/2022, 25 Maiu, kona-ba subsidiu tinan nia rohan ba uma-kain sira, maibé sei iha redasaun.
Ho nune’e, iha enkontru horseik, KM halo alterasaun balun no konsege aprova alterasaun ba dekretu lei refere.
"Konsellu Ministru finalmente aprova dekretu lei alterasaun dahuluk ba dekretu lei númeru 37 kona-ba subsidiu fim do ano ba uma-kain, orsida sei haruka kedas ba Prezidente Repúblika,” dehan nia iha palasiu governu hafoin reuniaun KM, Kuarta (12/10).
Molok ne'e, Prezidente Repúblika José Ramos Horta hatete subsidiu anual ba uma-kain nian di'ak liu fó ba komunidade sira ne'ebé la servisu no la hetan rendimentu.
"Subsidiu 200 ne'e buat rua, ida bele karik di'ak liu fó de'it ba komunidade ne'ebé empregu laiha ka sira-nia vensimentu ne'e kiik loos, ne'e solusaun ida. Solusaun seluk, ita ida-idak ho ita-nia konsiénsia fó osan ne'e, ita fó tulun ba sira ne'ebé osan laiha," dehan Horta.
