Akordu ida-ne’e asina iha loron 15 fulan-Novembru tinan 2023, iha Samoa, hodi substitui Akordu Cotonou anteriór.

Tuir komunikadu ne’ebé Online INDEPENDENTE asesu katak, akordu Samoa ne’e define kuadru jurídiku globál ba relasaun bilateral entre Uniaun Europeia no país sira OEACP nian ba tinan rua nulu oin mai.

"Akordu foun ida-ne’e estabelese prinsípiu komún no inklui área prioridade sira hanesan direitus umanus, demokrasia no governasaun di’ak, pás no seguransa, dezenvolvimentu umanu no sosiál, kreximentu ekonómiku sustentável no inkluzivu, sustentabilidade ambientál no alterasaun klimátika, migrasaun no mobilidade," dehan Komunikadu ne'ebé Online ne’e asesu, iha pajina Governu Timor-Leste, kuarta ne’e (30/04).

Entretantu, akordu ne’e inklui baze komún ida ne’ebé aplikavel ba parte hotu-hotu, kompleta ho protokolu rejionál espesífiku tolu ba Áfrika, Karaíbas no Pasífiku, ne’ebé adapta ho nesesidade no dezafiu partikulár sira husi rejiaun ida-idak.