Projetu ne’e iha komponente tolu mak hanesan, prestasaun servisu rekolla no tula lixu sira iha sidade Dili nian, relativu ba Lote 1 parte zona Leste no lote 2 parte zona Oeste, konsesaun design, konstrusaun, reabilitasaun no jestaun aterru nian ida no estasaun tratamentu lixu iha Tibar.
Fornesimentu ekipamentu sira ba rekolla lixu iha Dili no ba aterru no estasaun tratamentu lixu Tibar, no fornesimentu kontentór no kaixote lixu nian, fornesimentu ekipamentu rekolla lixu no ba operasaun aterru nian, no fornesimentu ekipamentu ba operasaun aterru nian.
“Konsellu Ministru delibera aprova prosedimentu aprovizionamentu nian kona-ba ajudikasaun kontratu sira relativu projetu jestaun lixu Dili nian, entaun ho ida ne’e tempu oin mai sei iha sistema jestaun iha Dili parte Leste no parte Oeste no mós iha sitema jestaun tantu transporte jestaun lixu sira, sei iha sistema foun no mós fatin tratamentu ba lixu Tibar mós sei hetan update atu bele di’ak liu ba ambiente bele iha dalan. Ita bele utiliza di’ak liu tan lixu sira bele tama ba iha reziklajen la’ós ba soe no sunu de’it,” Ministru Prezidensia Konsellu Ministru, Fidelis Manuel Leite Magalhães, hateten hafoin reuniaun KM iha Palasiu Governu, kuarta horseik (20/10).
Antes ne’e, Prezidente Autoridade Minisípiu Dili (PAM), Guilhermina Filomena Salsinha Ribeiro hateten, PAM orienta ona katak, lorloron Postu Administrativu ida orienta ka organiza ninia ema ne’ebé iha hodi halo limpeza.
Asistente Editor: Saturnina da Costa
