Xefe Klínika Bairo-Pite Inacio dos Santos hatete, iha fulan-Juñu nia laran klínika refere rejistu kazu TBC hamutuk pasiente 43.

“Husi númeru ne’e na’in 18 mak pozitivu TBC konfirmadu no agora sira izola aan hela iha klínika Tibar,  seluk fila ba uma no halo konsulta babain,”dehan nia iha knar fatin, Bairu Pite, foin lalais ne’e.

Enkuantu, hahú husi fulan-Janeiru to'o Juñu Klínika rejistu kazu TBC hamutuk 323.

Nia hatutan, husi númeru kazu pozitivu ne’ebé iha maioria halo izolamentu iha Tibar tanba barak mak mai husi munisipiu Baukau, Ermera no Bobonaro, tanba ne'e entermus de tratamentu ita hare mós sira nia  nutrisaun,"tenik nia.

Xefe afirma, populasaun maioria afetadu ba TBC, sira nia iha problema deznutrisaun ka má nutrisaun, entaun ida ne'e mak la'os haré deit ba tratamentu maibé ba mós rekoperasaun.

"Husi dadus pasiente ne'ebé mak Iha, iha atus ida liu mak kompleta ona tratamentu no sei atus ida liu mak sei halo tratamentu hanesan babain," dehan nia.

Xefe haktuir, relasiona ho kazu TBC ne'ebé aas, Klínika Bairo-Pite, forma ona ekipa ida hodi halo hela kontak-resin ho screening iha Munisipiu haat, Baukau, Manatuto, Lautem no Vikeke.

"Sira ba halo screening ba ita nia populasaun ne'ebé mai halo diagnóstiku no ita detekta kazu TBC, ita ba vizita sira nia fámilia hodi garante karak fámilia uma laran la iha ida mak afeitadu ba TBC," dehan Xefe.

Nia dehan, hafoin halo screening ba populasaun sira iha  Munispiu haat (4) ne'e remata, ija fulan-Agustu, ekipa Klínika Bairo-Pite kontinua fali iha munisipiu tolu hanesan, Bobonaro, Likisa no Ermera.

Nune’e, iha fulan Setembro sira sei kontinua fali ba munisipiu Aileu, Ainaro no Manufahi.