Prezidente KKLN, Vidal de Jesus “Riak Leman” konsidera asasaun pasifiku ne’ebé organiza husi grupu rua hanesan “Paz e Responsabilidade” ne’ebé lidera husi António Aitahan Matak no grupu “Rezistensia Nasionál Defende Justisa no Konstituisaun RDTL” ne’ebé lidera husi Angela Freitas la reprezenta veteranu sira iha Timor-Leste.
“Hametin unidade nasionál iha ita-nia leet hanesan uluk iha tempu rezistensia nasionál. Atu nune’e ita labele monu ba propogasaun politika ema individuál ka grupu seluk nian. Oras ne’e dadaun mosu grupu ida ho naran “Paz e Responsabilidade” ho asaun “Rezistensia Nasionál Defende Justisa ka Konstituisaun RDTL”. KKLN kaer metin valores rezistensia nasionál hodi hametin prinsipiu unidade nasionál no la hola parte ba asaun grupu ida ne’e nian,” dehan Riak Leman liu husi konfrensia imprensa iha sede KKLN, Matadouro Dili, Kinta (03/09).
