Madre Guilhermina Marçal hatete, haree ba natureza Timor-Leste nian povu ne’ebé fiar na’in ho kultura ida ne’ebé respeitoza tebes maibé ho tempu ida agora ema barak mós lakon nia integridade hanesan ema feto no mane ida.
Madre dehan, ohin loron, sidadaun sira mós harii média sosial ne’ebé ho hahalok in-responsabilidade hanesan kazu soe bebé, tanba bebé la’os ohin moris kedas maibé liu husi prosesu naruk ida.
Tanba ne’e, parte igreja konsidera katak, hahalok ida ne’e falta akompañamentu husi inan-aman, familia no viziñu sira.
“Problema ne’ebé ohin loron virál tebes ita dehan katak hari ita-nia media sosiál ne’e ho hahalok ne’ebé in-responsabilidade hanesan soe bebé, tanba bebé la’os ohin ita hetan nia moris kedas maibé liu husi prosesu naruk ida, no labarik feto ho mane ne’e moris husi família ida imposivel labarik ne’e hetan la iha sintomas ka sinais ida,” dehan Madre Guilhermina iha Balide, Segunda (04/03).

Madre esplika, Timor-Leste iha tinan 24 ona kazu soe bebe ne’ebé akontese sempre temi mak feto maibé seidauk iha mane ida mak deklara nia an katak bebé ne’e husi mós mane, tan ne’e, husu ba inan/feto sira bainhira hasoru situasaun hirak ne’e, tenki deklara ofisiál mós mane ne’e, maske nia la iha reponsabilidade mos tenki deklara sai. 
“Ita tama tinan 2024 ona problema kona-ba kazu soe bebé seidauk mane ida deklara nia an katak bebé nia iha tanba nia ho ha’u, nune’e mos feto sira tenki brani atu deklara sai katak ha’u mane ida ne’e mak kous, nia atu responsabilidade ka lae pelumenus iha deklarasaun ofisiál ida katak o ho nia mak o sai ko’us, maibé tuir mai ita haree katak inan sai vítima no sai mós arguida,” Madre Esplika
Iha sorin seluk Diretóra Fokupers Maria Fátima Pereira Guterres hatete to’o tempu ona inan-aman ho oan sira tenki kria relasaun amizade iha uma laran atu nune’e bainhira oan sira hasoru situasaun difisil, sira prontu atu ko’alia sai.
“kestaun ne’ebé presiza toma atensaun mak inan-aman sira nia papél oinsa atu kria ambinete ne’ebé amigavel no seguru iha família atu nune’e bele komunika ho labarik sira ba ohin loron nia ita presiza nakloke ba malu atu nune’e labarik sira mos prontu no livre atu fó sai sira nia problema,” dehan Diretóra.
Diretóra esplika, hanesan sosiedade sivil, halo mós kolaborasaun ho eskola sira, hodi halo sosializasaun kona-ba edukasaun reprodutivu no sexualidade ne’ebé kompeensivu.
Nia dehan atu redúz problema ne’e, ema hotu tenki iha konsiénsia, maibé bainhira ema la iha konsenisia mak esforsu sira ne’ebé sosiedade sivil no governu halo, sei la rezolve problema ida maske tau osan boot.