Prokuradór Jerál Republika (PJR), Alfonso Lopes informa, kazu pesoal PSIK rejistu ona iha MP.
“Ba kazu ida ne’e ha’u iha koñsimentu tanba rejistu iha ona iha Ministériu Públiku,” dehan Alfonso ba jornalista sira iha salaun Luz Clarita, Sesta (26/04).
Maske rejistu ona, maibé nia dehan, prosesu ba kazu ne’e sei iha hela investigasaun.
Molok ne’e, Autoridade Investigadór PSIK loke ona prosesu averiguasaun hasoru pesoal PSIK ne’ebé husu osan ba familia fujitivu Arnolfo Teves Jr.
Portavos Investigador Xefe PSIK, Mario Tavares hatete, daudaun ne’e PSIK loke ona prosesu averiguasaun ba pesoal ne’ebé husu osan ba familia fujitivu Teves Jr, ne’ebé sei hala’o durante loron 10 nia laran.
"Ami loke ona prosesu averiguasaun hasoru pesoal PSIK ne’ebé envolve iha kazu husu osan, tuir dokumentu ne’ebé ha’u asesu katak sei loke prosesu averiguasaun durante prazu loron 10 nia laran atu konklui prosesu ne’e,” dehan Mario ba jornalista sira liu husi konferensia imprensa iha edifisiu PSIK, Kolmera, Dili, Tersa (09/04).
Iha prosesu averiguasaun, nia dehan, durante loron 10 sei aplika mós proseu disiplinar ba pesoal refere.
Tuir nia, aktu husi pesoal PSIK ne’e la nu’udar aktu pesoal no laos ho orientasaun husi superior sira.
“Tanba ne’e idaidak sei hatan ba nia responsabilidade ba aktu ne’ebé nia komete iha prosesu averiguasaun no prosesu disiplnar," dehan nia.
Entretantu, pesoal Polisia Sientifika Investigasaun Kriminal husu osan ho valor rihun $2 ba fujitivu Arnolfo Teves Jr nia familia. Pesoal PSIK ne’e deklara ho osan refere sei fó ba guarda prizaun hodi garante seguransa 100% ba Teves.
Tuir dokumentu ne’ebé Jornal INDEPENDENTE asesu, pesoal PSIK haruka mensajen ba Teves nia oan mane hodi informa kona-ba situasaun husi nia aman ne’ebé daudauk ne’e iha hela prizaun laran.
Iha mensajen ne’ebé pesoal PSIK haruka ba Teves nia oan mane, pesoal PSIK ne’e hatete katak nia foin ba vizita Teves iha prizaun ho objetivu atu haree ninia kondisaun seguransa.
Pesoal ne’e dehan, nia haree katak Teves nia seguransa ne’e garantidu, no husi PSIK sei kontinua ba vizita hodi haree, tan ne’e nia husu Teves nia oan mane atu apoiu osan $2.000 ba nia.
Osan ne’e, pesoal PSIK ne’e dehan, nia sei uza hodi sosa buat ruma ba guarda prizioneiru sira.
Hafoin haruka mensajen, Teves nia oan mane telefone direita ba pesoal PSIK hodi bele hetan esplikasaun di’ak liu tan.
Iha konversasaun refere, pesoal PSIK ne’e esplika katak osan refere atu bele garante seguransa ne’ebé di’ak liu ba Teves.
Pesoal PSIK ne’e hatete, guarda prizioneiru sira la husu maibé se posivel bele fó osan ba sira atu garante seguransa 100% ba Teves.
“Sira la husu ba ha’u atu … maibé ha’u hanoin se posivel ita fó osan ba sira atu sira bele garante seguransa 100% ba ita-boot nia aman,” pesoal PSIK ne’e hahú esplika nia intensaun.
Pesoal ne’e hatutan, iha tempu kotuk nia koalia ho Diretór Nasionál Prizaun no Diretór ne’e orienta nia membru na’in tolu ka haat hodi fó seguransa privadu ba Teves.
