Tuir Kordenadór Forsa-Tarefa ba Prevensaun no Mitigasaun Surtu COVID-19 Dr. Rui Maria de Araújo hatete, ohin 27 fevereiru 2021, Ministeriu Saude rezista tan kazu konfirmadu positive Covid-19 na’in ida, transmisaun lokal iha agrupamentu ou Cluster Klauhalek ne’ebé da’et ona iha aldeia Onu-Laran, Suku Maudemu, Postu Administrativu Tilomar.
Nia esplika, Iha loron 25 no 26 fevereiru 2021, ekipa konjunta vijilánsia epidemiolójika no laboratóriu, kontinua halo rastreiu iha aldeia Klauhalek, suku Belulik leten, Postu Administrativu Fatumea, Munisípiu Covalima, no rekolla tán amostras husi ema ne’ebé kontaktu besik ho Kazu Primariu Klauhalek (KPK).
“ Iha prosesu rastreiu ba kontaktu besik ho KPK horiseik, hetan informasaun adisionál katak KPK halo mós kontaktu ho ninia belun balu iha Postu Administrativu Tilomar. Hafoin buka tuir, ekipa hetan duni sira, hafoin halo análize laboratóriu, hetan rezultadu pozitivu ida (1).” Dehan nia liu husi Konferensia Imprensa iha Sentru Integradu Jestaun Kriza (SIJK), CCD,Merkadu Lama (27/02).
Nia hatutan, Kazu konfirmadu foun ida ne’e, mane, tinan 42, servísu nu’udar estensionista, hela iha aldeia Onu-laran, Suku Maudemu, Postu Administrativu Tilomar, halo kontaktu ho KPK entre 11 ho 13 fevereiru 2021.
Pasiente refere, informa katak nia seidauk halo viajen sai husi Covalima, maibé iha kontestu hala’o ninia kna’ar nu’udar estensionista, nia halo kontaktu ho kolega servísu, ho mós superior irárkiku iha servísu munisipál agrikultura Covalima, inklui mós ho populasaun balun iha Tilomar no Fatumea.
“ Kazu foun ida ne’e hamosu indikasaun katak transmisaun lokál iha agrupamentu ka cluster Klauhalek, nakda’et tutan, ka espalla ona to’o Aldeia Onu-laran, Suku Maudemu, Tilomar, no iha mós possibilidade nakda’et ka espalla ona iha Suai vila, ho fatin seluk tán iha Covalima nia laran.” Nia informa
Nia akresenta, ekipa konjunta husi vijilánsia epidemiolójika nível nasionál, laboratóriu nasionál saúde, Serbísu Munisipál Saúde hamutuk ho autoridade administrativa Covalima, ne’ebé integra iha Unidade Territórial CIGC-SS, Munisipiu Covalima nian, oras ne’e dadaun hatun ekipa 4, hodi buka tuir ona ema hotu ne’ebé halo kontaktu besik ho kazu foun ida-ne’e.
Atual dadus jeral, Kazu konfirmau foun na’in ida, kazu atual baixa hamutuk 22.
