Prezidente INSP-TL, Nevio Sarmento hatete, dadus ne’e hetan husi servisu hamutuk entre Diresaun Nasionál Prevensaun no Kontrola Moras ho INSP-TL.
“Husi Janeiru to’o loron 9 Marsu ami rejista kazu dengue pozitivu hamutuk 3.700 ho mortalidade 24 kazu, ho taxa mortalidade ka case fatality rate 0.6% iha Timor-Leste tomak,” dehan Nevio ba jornalista sira iha Tower Bar Fatuhada, Sesta (13/03).
Tuir nia, kazu dengue barak liu rejista iha Dili, tuir fali Ermera no Likisa.
Nevio esplika, kazu barak iha Dili tanba munisípiu ne’e iha populasaun barak liu no barak mak hela iha uma ne’ebé besik malu.
“Ita sukat katak 58% populasaun afetadu iha Munisípiu Dili, tanba ne’e mak kazu dengue iha ne’ebá aas liu,” nia dehan.
Nia afirma, moras dengue afeta liu labarik sira ho idade 0 to’o 14 tinan. Tanba ne’e, autoridade saúde husu komunidade atu halo limpeza iha ambiente atu prevene susuk ne’ebé transmite dengue.
“Ami-nia intervensaun iha rua, mak intervensaun klínika no intervensaun ambientál. Ba intervensaun klínika, ospitál sira komesa hasoru ona númeru pasiente dengue ne’ebé aas,” nia dehan.
Tanba númeru pasiente sa’e, governu mós loke ospitál temporáriu iha Tasi Tolu, Vera Kruz no Lahane atu ajuda trata pasiente sira.
Iha parte seluk, reprezentante World Health Organization (WHO) iha Timor-Leste, Arvind Mathur, hatete katak tuir dadus OMS simu iha 10 Marsu, kazu dengue iha tinan 2026 komesa sa’e maka’as.
“Hahú husi Janeiru to’o Marsu 2026 kazu dengue hamutuk rihun tolu resin no ema 24 lakon ona vida. Kazu aas liu iha Dili, tuir mak Ermera no Likisa,” dehan Arvind.
Nia akresenta, OMS no Ministériu Saúde (MS) agora halo avaliasaun hamutuk atu identifika fatin sira ne’ebé risku aas ba transmisaun dengue.
Arvind hatutan, maioria kazu dengue ne’ebé rejista iha labarik sira ho idade tinan 5 to’o tinan 14, tanba susuk Aedes normalemente tata iha tempu loron, bainhira labarik sira halimar ka ba eskola.
OMS no Ministériu Saúde apela ba komunidade atu halo limpeza iha uma no ambiente atu prevene susuk dengue, tanba prevenasaun moras ne’e responsabilidade ema hotu-hotu nian.
