Arsebispo Dom Virgilio Kardeal da Silva hatete, Universidade Kátolika kria tan istória ida ne'ebé universidade iha komprimisiu atu kria kondisaun ba estudante ne'ebé iha área komunikasaun sosial nian.

Kardeal dehan, laboratoriu ne'e hanesan sentru formasaun ba estudante no jovem sira ne'ebé halo hela estudu iha UCT ne'ebé hakarak hala'o knar iha komunikasaun sosial nian.

"Hanoin konaba importante Komunikasaun Sosial ninian hodi treinu ita nia futuru komunikadores uza meius komunikasaun didiak. Tan ne'e universidade kompromete nia an atu eduka no treinu joven sira ne'ebé hala'o sira nia estudu iha área ida ne'e," dehan Kardeal iha Salaun UCT Balide, Kinta (07/09).

Iha biban ne’e, Kardeal hato'o parabens ba Reitor UCT ne'ebé ho esforsu kria tan kondisaun ba estudante sira iha área refere.

Enkuantu, universidade ne’e prepara kondisaun ne'ebé kompleta ho instrumentu sira ba prátika filmajem, montajem programa no to'o iha transmisaun.

Iha fatin hanesan, Reitor UCT Casmiro Pinto hatete, laboratoriu ne'e hanesan sentru formasaun ba estudante sira ne'ebé hala'o knar iha Komunikasaun Sosial nian, hodi prepara sira ba abanbairua nian.

"Prepara sira ba kameramen, eskritor notisia nian, no sai fotografer, ho ida ne'e mak ami oferese ekipamentus ne'ebé adekuadu," dehan Reitor.

Reitor husu ba estudante sira atu uza sasan sira ne’e ho kuidadu, tanba ida ne'e, investimentu boot ne'ebé santa kreda halo liu husi igreja Kátolika ne'ebé atu ajuda foinsa'e sira ne'ebé hakarak atu aprende Komunikasaun Sosial.