Observasaun diáriu ne’e iha Aeroportu Komoro, iha loron Sábadu (2/3), maizumenus tuku 12: 50, meiudia, Kalbudi sa’e daudaun aviaun City Link, liu husi salaun Very Important Person (VIP).
Francisco Kalbuadi foin retoma pozisaun nu’udar deputadu PN semana ida. Antes ne’e, nia ba estranjeiru ‘hafoin’ hetan notifikasaun husi Ministériu Públiku (MP) kona-ba kazu brankeamentu kapitais relasiona ho angariasaun fundu ba kampaña Partidu CNRT, iha 2012.
Dezde Ministériu Públiku hasai karta notifikasaun, Sekretáriu Jerál partidu CNRT ba estranjeiru durante fulan rua nia laran, no foin fila hikas iha Sábadu (23/2), nune’e foti kedas pozisaun iha Parlamentu Nasionál iha Segunda (25/2).
Antes ne’e, Prezidente Bankada Partidu CNRT, Duarte Nunes hateten, Sekretáriu Jerál Partidu CNRT, Francisco Kalbuadi Lay, nu’udar lideransa partidu nian sei la halai sees husi justisa.
Nia hateten, karta informasaun doutór nian relasiona ho kondisaun saúde Kalbuadi nian.
Entretantu, Deputadu Bankada FRETILIN, Joaquim dos Santos hateten, Sekretáriu Jerál Partidu CNRT nia hetan ona notifikasaun husi Tribunál dala tolu ona, maibé seidauk kumpre ezijénsia husi setór justisa nian.
Kalbuadi hanesan deputadu efetivu bainhira retoma fali nia pozisaun tanba lei mak garante, maibé iha substánsia ne’e hatudu Kalbuadi ta'uk atu ba hataan iha Tribunál ne’e mak mai fali iha PN bainhira hetan tiha notifikasaun.
Haree husi prosesu ne’e, parte Ministériu Públiku tenke halo fali notifikasaun foun hodi husu ba PN atu hasai imunidade, maibé sira husi AMP hakarak hasai hanesan uluk deputadu PD na'in rua ne’e ka lae.
Bainhira notifikasaun dala tolu ona maibé la iha resposta ho razaun ruma halo ona karta mandadu kapturasaun.
