Diretór Nasionál Orsamentu no Jestaun Finansas iha Ministériu Saúde (MS),  Miguel Maria hateten, gastus ba pasiente sira ne’ebé hala’o tratamentu iha ospitál Indonézia, Malázia no Singapura ho orsamentu ne’ebé bo’ot tebes.

“Normalmente kada tinan ita nia gasta ba ema moras sira  iha rai liur mínimu liu ne’e millaun $9 no másimu liu ne’e millaun $12. Iha tinan ne’e ami hetan de’it alokasaun milluan $4.7  to’o iha fulan Maiu ita nia balansu ne’e kuaze la sufisiente ona. Ita iha rezerva osan oitoan de’it ba operasionál nian, tanba ne’e hakarak lakohi ita tenke salva ema nia vida,” dehan nia ba Jornalista iha MS, Sesta (07/10).

Kazu ne’ebé transfere ba rai liur ne’e signifika médiku sira ne’e atende la bele ona, entaun tenki  transfere maibé  husi ospitál  ne’ebé sira ba ne’e submete fali invoice  pasiente sira nia kustu tratamentu ne’e mós problema oitoan tanba kustu ne’e montante bo’ot.

Tanba ne’e, MS ba husu orsamentu adisionál ba iha Ministériu Finansas, maibé Ministériu Finansas husu ba MS tenki halo ezersísiu ba orsamentu internál no tenki indetifika balansu nune’e bele responde ba pagamentu  dividas ne’ebé urjente.

Ezemplu iha ospitál Indonézia nian ba pagamentu dívidas pendente kleur la selu husi intervensaun governu ba governu.

Tanba ne’e, MS hetan karta husi embaixada Indonézia husu atu tenki selu dívidas, nune’e hanesan nasaun ida tenki iha responsabilidade atu responde.

Invoice ne’ebé iha MS nia liman besik millaun $4 verifikadu ona hein de’it selu ba dívidas no daudaun ne’e dívidas bo’ot liu ne’e maka nasaun Indonézia.