Komandante Jerál PNTL, Komisáriu Faustino da Costa, husu ba Armando Monteiro, atu simu kna’ar hanesan adidu foun ho responsábilidade, tanba reprezenta instituisaun no nasaun doben Timor-Leste.

“Hanesan ohin ha’u dehan, ita bo’ot hodi reprezenta nasaun Timor-Leste no instituisaun PNTL hodi hala’o kna’ar hanesan adidu ho responsábilidade. Ne’e duni, fiar katak ho mandatu tinan tolu bainhira fila mai, ita bo’ot bele halo buat ruma ba PNTL ho Nasaun TL,” dehan Faustino ba jornalista sira hafoin remata serimonia despedida  iha Kuartel Jeral PNTL, Kaikoli,(07/10).

Nia dehan, Superintendente Xefi Polisia, Armando Monteiro ba hodi troka fali adidu seguransa Komisariu Julio Hornai ne’ebé kuaze fulan tolu ona fila ona mai TL no agora dadauk servisu hela iha Ministeriu Interior.

Husu kona ba ema ne’ebé atu subtituisaun knar portavós Komandu Jeral PNTL hodi troka Armando Monteiro, nia hatan, iha ona despaixu sei indika fali superintendente Polisia ida hodi lidera.

“Ema ne’ebé sei subtitiu fali knar portavos PNTL, despaixu husi ha’u nia gabinete ita indika temporáriumente nomeia superintendente, señor Moises Amaral,” hakotu nia.

Iha fatin hanesan, Superintendente Xefi, Armando Monteiro hateten, nia parte prontu kumpri misaun diplomata hodi reprezenta estadu TL ho instituisaun PNTL nu’udar adidu iha Jakarta-Indonezia.

Nia informa, kna’ar foun ne’ebé mak parte komandu jeral PNTL depozita tuir  despaixu Governu nian liu husi Ministeriu Interior (MI), ho Ministériu Negósiu Estranjeiru no Kooperasaun (MNEK), iha misaun importante ida, hanesan  diplomata, husi negosiu estranjeiru, liu husi TL nia embaixada mak destakadu iha Jakarta, maibe nafatin ho responsábilidade ba ministériu interior, no mós iha Irárkia estrutura komandu jerál PNTL nian.

“Misaun importante ne’ebé ha’u hala’o mak halo kooperasaun polisial, oinsá atu halo dezenvolvimentu kapasitasaun instituisaun PNTL ne’ebé mak halo ona ho POLRI iha tinan barak nia laran,” promete nia.

Nia afirma, durante pandemia global Coivid-19, iha programa importante barak mak labele realiza, tanba ne’e ba oin sei kontinua tenta no halo esforsu atu fó oportunidade nafatin ba instituisaun PNTL, hodi nune’e partisipa ba formasaun saida de’it mak oras ida sei fornese husi parseiru POLRI ba PNTL.

Alende ne’e, iha mós kna’ar importante seluk durante tinan tolu sei halo mos prevensaun no kombate krime organizadu ne’ebé mak durante mosu, no sai mós preukupasaun boot iha média ho sosiedade tomak, inklui nia na’i ulun sira iha rai ida ne’e, tanba timor oan barak mak oras ne’e hela iha Indonézia, maibé parte autoridade seguransa hanesan  PNTL rasik mos seidauk bele hatene dadus loloos konaba timor oan iha Indpnezia.

“Maibé ida ne’e mós problema ida ne’ebé mak konfiansa ne’ebé mak fó mai ha’u, oinsá atu bele serbisu hamutuk ho parte edukasaun ninian, tantu mós liñas ministeriais sira seluk, liu husi adidu ne’ebé mak destakadu iha ne’eba, oinsá bele kria sistema ida, hodi sai odamatan ida, nune’e ita bele kontrolu, hatene ita nia timor oan ne’ebé mak tama no sai iha nasaun indonézia, tantu halo estudu, serbisu, no mós viájen iha ne’eba, hodi nune’e ita bele hatene,” afirma nia.