Iha Serimónia tranferénsia kargu Prezidente Konsellu Konsultivu Fundu Petrolífetu sesante, Padre Júlio Crispim ba Prezidente eleitu, Juvinal Dias no lansamentu relatoriu anuál 2016 to’o 2018 husi KKFP ne’ebé marka prezensa husi Prezidente Parlamentu Nasionál, Aniceto Guterres no deputadu sira no reprezentante Governu atuál Ministru Asuntu Parlamentár no Komunikasaun Sosiál, Francisco Jerónimo.
Iha serimonia asina asinatura entre Prezidente KKFP Foun, Juvinal Dias no Prezidente Sesante, Pe. Júlio Crispim, sasin husi Prezidente Parlamentu Nasionál, Deputadu Aniceto Guteres no membru deputadu sira.
Prezidente Parlamentu Nasionál, Aniceto Guterres hateten, mandatu konselleitu Pe. Júlio Crispim remata ona.
“Ha’u haruka ona karta notifikasaun ida ba Konfisaun Relijioza sira liuhusi Arse-Bispu atu nomeia hikas membru foun hodi substitui Padre Júlio Crispim maibé ho preferénsia designasaun foun ne’e mai husi Igreja Katólika maibé to’o daudaun ne’e seidauk hetan informasaun, loloos pose ohin, entaun ida-ne’e seidauk akontese”, diskursu PPN, Aniceto Guterres, iha Parlamentu Nasionál, sesta (19/06).
Prezidente Parlamentu Nasionál fó nia apresu no agradese wain ba konselleiru sira iha mandatu ida ne’e, ne’ebé serbisu halo krítika ne’ebé hatudu ona iha relatóriu ne’ebé ohin halo lansamentu.
Prezidente PN ne’e agredese ba Prezidente Sesante, Padre Júlio Crispim ne’ebé hakotu ona nia mandatu nu’udar konselleiru no prezidente konsellu. ba ninia dedikasaun no kontribuisaun tomak ba konsellu ida-ne’e.
Prezidente Pralamentu Nasionál ezije ba membru deputadu, membru governu sira no ukun na’in sira hotu ne’ebé iha podér hola desizaun politika atu fó tempu ba halo leitura no konsidera netik pareser hosi KKFP ne’ebé husu tenke konsidera fatór sira ne’ebé fó influénsia ba fundu minarai.
“Ha’u hakarak enkoraja konselleiru sira-ne’ebé mandatu tuir mai kontinua halo abordajen krítika no kle’an kona-ba fundu petrolíferu ba Timor-Leste. Sura ho hau nia apoiu, deseza susesu ba konsellu konsultivu fundu petrolíferu,” nia fó hanoin.
Iha fatin hanesan, Prezidente KKFP Eleitu, Juvinal Dias, hateten konsellu sei hala’o kna’ar fó asesóra ka pareser ba Parlamentu Nasionál no Governu ho kualidade kona-ba estabilidade no sustentalidade fundu minarai.
“Ita presiza fó pontu de vita atu parlamentu no governu foti desizaun di’ak liu tanba kuandu ita husik levantamentu husi fundu petrolíferu ba orsamentu estadu tuir polítiku sira-nia hakarak, sein kontrolu husi sosiedade entaun fundu ne’e loron ida sei sai de’it istória ba ita,” nia fó hanoin.
Prezidente KKFP, Juvinal husu Parlamentu Nasionál no Governu atu konsidera fatór prinsipál haat (4) ne’ebé influénsia dezempeñu fundu petrolíferu mak hanesan merkadu finanseira, rezerva petrolíferu, presu minarai mundiál no levantamentu fundu minarai ba Orsamentu Jerál Estadu (OJE).
