Prezidente INSS, Longuinhos Armando hateten, subsídiu 60% ne'ebé antes ne'e governu planu atu oferese ba kompañia sira hodi asegura traballadór durante situasaun emerjénsia pandemia Corona Virus Disease (Covid-19), halo pagamentu ho montante orsamentu tokon US$7 ba kompañia hamutuk 610 ne’ebé kompleta ona dokumentu.

"Ami haree ba sira nia pedidu ne'ebé aprezenta daudaun rejistu kompañia ne'ebé husu governu apoiu 60% hamutuk 1.213, agora daudaun prontu ona atu fó apoiu mak hamutuk 610 ne'ebé prosesu administrasaun klaru hotu ona no seluk tékniku sira sei halo verifikasaun", dehan nia, iha edifísiu MSSI, Kaikoli, Sesta (19/6).

Longuinhos dehan, motorista sira ne'ebé rejistu ona hamutuk kuaze 900-resin no agora sei iha prosesu verifikasaun foin 290 mak tama kritériu no seluk sei prosesu iha prosesu verifika.

Nia salienta, antes ne'e INSS ninia proposta orsamentu hato'o hamutuk tokon US$11, maibé agora ba faze dahuluk governu liuhusi Ministériu Finansas foin transfere tokon US$ 7 atu halo pagamentu.