José Belo ho naran kodigu resisténsia funu “Taraleu” simu ona pose, ohin tersa (11/4), nudar Presidente Konsellu Administrasaun Radio no Televizaun Timor-Leste (RTTL-EP) ba mandatu tinan 4 hahú tinan 2021 to’o tinan 2025.
Presidente RTTL, ep foun ne’e esplika, setór prioridade haat, maka nia sei hadia infrastrutura intermus harí edifisiu foun RTTL-E.P nian, inklui sosa ekipamentu komunikasaun foun tuir padraun internasional.
Hadia mós kualidade notisia atu iha balansu no kredivel nomós promove marketing hodi buka fundus rasik.
“Ohin ha’u simu posé sai nudar Presidente RTTL-EP foun, maibé responsabilidade ne’ebé ha’u simu todan uituan, tanba Timor-Leste mós luta hela hasoru pandemia Covid-19, aleinde ida ne’e mós RTTL-EP nia edifisiu tuan mós hetan estragus husi inundasaun 4 Abril, tanba ne’e atu realiza programa hirak husu ba entidade hotu hotu liliu Governu hodi tau osan atu nune’e ita bele realiza RTTL-EP nia mehi nudar empreza públiku hodi transmite informasaun lolos no kredivel ba publiku," dehan nia iha salaun MAPKOMS, tersa ohin (11/5).
Ho nune’e, nia promete sei lori RTTL-EP sai di’ak liu tan iha futuru no hadia dezenpeño servisu sai empreza publiku hodi fornese informasaun ne’ebé kredivel no balansu ba publiku.
Atu realiza mehi ida ne’e husu entidade hotu liu-liu ba jornalista sira atu servisu hamutuk sai forsa ida deit.
Nia mos promete sei la halis ba koor politiku ruma tanba ne’e nia sei lidera RTTL-EP sai empreza publiku ne’ebé hamrik metin independentemente hodi oriente jornalista hotu atu hadia di’ak liu tan, hodi manan konfiansa publiku nian liuhosi informasaun ne’ebé balansu no kredivel ba publiku.
Iha Fatin hanesan Minístru Asuntu Parlamentár Komunikasaun Sosial (MAPKOMS), Francisco Martins da Costa Pereira Jerónimo husu ba Presidente foun ne’e atu banati tuir lei komunikasaun sosial nian iha artigu 42 hodi servisu tuir papel komunikasaun iha Timor-Leste no husu atu ajuda Governu buka osan hadia programa sira.
MAPKOMS garante katak, Presidente foun RTTL-EP sei halo nia knar ho diak tanba nia iha esperensia jornalismu nian komesa husi tempu indonesia to’o agora.
MAPKOMS sei tau osan noton ba RTTL-EP hodi hala’o nia programa no halo mudansa signifikativu iha futuru.
Jornalista: Camilio de Sousa
Asistente Editor: Saturnina da Costa
