Tuir Embaixador Australia iha Timor-Leste, Peter Robert hatete, material hirak ne’e hodi suporta grupo vulneravel no ema ho defisiensia ne’ebé sai vitima ba inundasaun.
“Sasan sira ne’e mai husi Australia mak mai, hodi fó apoiu ba ita nia maluk vulneravel sira no defisiensia sira ne’ebé afeitadu husi inundasaun iha loron 4 fulan-abril liu ba,”dehan nia iha serimonia intrega sasan, iha salaun MSSI, Kaikoli, tersa ohin (11/05).
Nia hatutan, sasan sira ne’e intrega ba MSSI, hafoin distribui ba vitima grupo vulneravel sira no ema ho defisiensia iha tempu badak.
Iha fatin hanesan, Minístra MSSI, Armanda Berta hato’o agradese ba Governu Australia liu husi nia Embaixador iha Timor-Leste, tanba bele ajuda ona feto, labarik no ema ho defisiensia ne’ebé vulneravel liu.
Entretantu, material sira ne’ebé apoiu ba grupo vulneravel no ema ho defisiensia sira mak hanesan, material íjiene ba labarik sira hamutuk 80 kaixa, sasan dapur 80 kaixa, manta 400, moskiteru 240, maskara 377 kaixas no lona 80.
Jornalista: Novencio do Carmo Vieira
Asistente Editor: Saturnina da Costa
