Primeiru Ministru, hatete, imprensa la’ós deit fó informasaun, maibé halo análiza no hadia aan nafatin. Tanba, sertifikadu ne’ebé Governu fó ba midia nuudar apresiasaun ba jornalista sira nia nia esforsu.

Tuir Xefe Governu, iha konstrusaun nasaun, Imprensa mós sai nuudar elementu importante ida hodi fó informasaun ba povu tomak no fó mós informasaun koresaun ba joven no sidadaun sira hotu.

“Ohin aproveita Halo apelu ida ne’e ba imi, esforsu aan nafatin, aumenta kbiit análiza kritika, kuandu atu hasai informasaun ida investiga uluk, halo análiza la’os fó deit informasaun, maibé halo análiza, hakerek, no ko’alia no espoin. Ho ida ne’e mak imi ho kbiit ne’ebé boot, analiza, investiga nune’e mundu hare ba ita nia rain, kompara, imi bele produs informasaun ne’ebé los, informasaun ne’ebé eduka sidadaun sira, no informasaun ne’ebé hadia liu tan sidadania espiritu iha Timoroan idaidak”, dehan PM Xanana iha Meet The Press no Atribuisaun sertifika apresiasaun ba midia sira ne’ebé halo trasmisaun direita ba vizita Santo Papa nian, iha Salaun Liline Larigutu, CNE, Kolmera, Dili, sabado ne’e (05/10/24).

Xanana Gusmão mós akresenta liu tan, Imprensa la’ós atu fó deit informasaun maibé buka hametin hanoin, kria hanoin ida ne’ebé koalia moos kona ba situasaun, hodi influensia sosiedade liliu joven sira atu bele hadia sira nia komportamentu nuudar sidadaun ida.

“Imprensa buka akompaña mundu, hodi informa ba povu no sosiedade Timor katak saida mak akontese iha mundu.Timoroan nu’udár sidadaun di’ak ida haree katak sira iha ne’ebá hanesan ne’e no nu’udár Timoroan tenke halo di’ak liu, bele sai sidadaun mundu nian ne’ebé d’iak, bele fó ezemplu. Agora Timor-Leste iha ona dijitalizasaun, buka atu informa ba públiku informasaun sira ne’ebé util ba sosiedade no povu iha país ne’e.  Jornalizmu la’ós de’it ita haree ba lokal liu, ita hare nia hatais saida, ko’alia saída, mais loke imi nia hanoin ba mundu hodi foti uitoan husi mundu mai iha Timor-Leste,” Xanana hateten.

Entretantu, PM Xanana haktuir, imprensa mós presiza ko’alia uitoan kona-bá situasaun funu iha mundu, situasaun ekonomia, ko’alia mós kona-bá pás no situasaun mundiál sira seluk ne’ebé atualizadu.

“Imi komesa la’o di’ak ona, no kakutak mak tenke funsiona liu, sai matenek liután, la’ós atu lori notísia di’ak husi Timor ba mundu, maibé hodi notísia husi mundu mai Timor hodi bele eduka joven sira hodi halo komparasaun, tanba bainhira ita la hatene halo komparasaun iha aspetu ida ka asuntu ida ka iha área seluk ita hela de’it iha uma laran,”Hakotu nia.