Kondekorasaun ne’ebé Prezidente Repúblika atribui ba media sira maka medalla ho ordem méritu no mós sertifikadu rekuiñesimentu.
Hafoin kondekorasaun ne’e, Prezidente Repúblika José Ramos Horta liu husi nia diskursu hatete, hanoin fali ba Papa nia vizita, media barak mak halo transmisaun direita iha momentu eventu istóriku ne’e, ne’ebé iha susesu boot no mundu tomak mós hatene.
Xefe Estadu dehan, Media nasional no internasional nia papel importente tebes hodi transmite informasaun ba mundo.
Ho nune’e, Prezidensia Repúblika hanoin atu fó rekuiñesimentu no intensive ba media sira nia esforsu durante vizita Santo Papa nian.
"Ne'e duni ami hanoin iha prezidensia, ita tenki hatene no rekuiñese Radio RTTL, empreza públika iha apoiu hotu-hotu tanba estadu nian, apoia insentivu ba media sira, klaru balun iha rekursu barak liu hanesan RTTL, maibé balun privadu nian," Dehan Prezidente Horta iha Palasiu Prezidensial Ai-tarak Laran, (12/12).
Prezidente hatutan, iha mundu modernu teknolojia importante liu, jornalista sira mós matenek iha kreatividade espiritu no sakrifisiu.
Iha fatin hanesan, Diretor Ezekutivu Jornal INDENPEDENTE, José Sarito Amaral, senti onradu hetan kondekorasaun no rekuiñesimentu husi Prezidente Repúblika José Ramos Horta ne'ebé kondekora ona Jornal INDEPENDENTE no mós media 11.
"Ida ne'e, ha'u senti onradu tebes ba rekoñesimetu iha ita nia susesu, ba ekipa tomak televizaun, emprime no staf tomak iha Jornal INDEPENDENTE,”
Ida ne’e, hanesan motivasaun diak ida ba media sira, atu servisu makaas hodi servi nafatin públiku.
Diretor Ezekutivu ne’e mós agradese ba fundador Jornal INDEPENDENTE nia akompañamentu liuliu Fundador Orcar Lima no fundador sira seluk ne’ebe fó mós apoiu moral, hodi Jornal INDEPENDENTE mantein ho ninia independensia no imparsialidade iha publiku.
"Kondekorasaun ne'e tanba ita halo kobertura ba amu Papa nia vizita ne'ebé durante loron tolu iha Timor-Leste, la'os ba media Jornal INDEPENDENTE de’it maibé ba media Timor-Leste tomak," katak Diretór.
Media 12 mak hanesan, Radio Televizaun Timor-Leste, Empreza Públika (RTTL,EP), Ajensia Notisioza Tatoli, Institutu Publiku, Grupu Média Nasionál,(GMN), Hatutan.Com, Diario Timor Post , Jornal INDEPEDENTE, Video Information Provider (VIP), Dili Post, Lafaek News, Televizaun Edukasaun Timor, Suara Timor Lorosa'e no SmNews Timor.
Alénde ne'e, Prezidente Repúblika mós atribui premiu fotografia ba vensedor na’in neen ba durante vizitasaun Papa Francisco nian iha Timor-Leste.
