Ministra Edukasaun Dulce Jesus Soares hatete, estudante finalista iha tinan 2024 ne’ebé rejistradu hamutuk na’in 55.661, kompostu husi nivel ensinu baziku iha estudante na’in 28,216, ESJ na’in 23.661, Ensinu Sekundariu Tekniku Vokasional (ESTV) na’in 3.733 no Ensinu rekorente iha na’in 364.
Ho nune’e, husi númeru ne’e, estudante ensinu báziku ne'ebé tuir ezame nasional hamutuk na’in 27,954 no aujensia iha na'in 262, ESJ 23,322, aujensia 339, ESTV iha na’in 3,682 no aujensia na’in 51 no Ensinu rekorente na'in 337 no aujensia 27.
Hafoin halo koressaun no validasaun ba rezultadu ezame nasional hatudu katak, estudante husi ensinu baziku iha na’in 27.470 ka pursentu 98,27 mak pasa, no estudante na’in 484, ekivalente pursentu 1,73 reprovadu, tanba la priense kriteriu ne’ebé ministeriu edukasaun estabelese.
Husi ensinu sekundaria jeral iha estudante na’in 22.922 ka pursentu 98,28 mak aprovadu, no na’in 400 ho ekivalente pursentu 1,72 reprovadu.
Maibé ba estudante sira husi ESTV ho ensinu rekorente aprovadu ho 100%.
“Iha ne'e, iha estudante ensinu baziku na’in 484 mak reprovadu, no estudante iha ensinu sekundaria jerál hamutuk na’in 400 mak reprovadu, nune’e total hamutuk 884 mak reprovadu iha tinan ida ne'e, " Dehan Ministra iha salaun konferénsia ME Vila Verde, Sesta (13/12).
Entretantu, Koordenadór Kurikulum iha Ministériu Edukasaun, João Maupelu hatete, estudante ne'ebé reprovadu ka la liu iha ezame nasional, tanba sira nia valór la atiji kriteriu minimu ne'ebé estabelese iha Ministériu Edukasaun.
