Ínisiu jogu, Ekipa Cabo-Verde halo kedan atake ne’ebé másimu hodi fo presaun ba liña defensivu Timor-Leste nian, liu husi lansa kedan sutu balun ba Ekipa Timor-Leste.

Ekipa Cabo-Verde ne’ebé ambisaun manan, ikus mai liu husi nia jogadór, Victór Monteiro ho numeru kamizola 15, konsege  hatama golu ba guarda rede Timor-Leste liu husi sutu ne’ebé jogadór ne’e lansa, hodi muda score ba 1-0.

Husi golu ne’e, Ekipa Timor-Leste la nonok, koko halo kontra atake ba ekipa Cabo Verde, liu husi liña médiu parte karuk, iha minutu 7, Timor-Leste konsege hetan oprtunidade atu bele resoponde golu, maibé oportunidade ne’e hela de’it ho naran, tanba jogadór sira la uza oportunidade ne'e ho di’ak.

Ritmu jogu kontinua sa’e liután, Cabo Verde ne’ebé halo jogu ho agresivu tuir estrátejia ne’ebé sira iha, hodi halo lansa atake ne’ebé maka’as liu tan, nune’e iha minutu 12 jogadór, António dos Reis ho numeru kamizola 7, lori bola husi parte liman los hodi lansa sutu ne’ebé maka’as halo Guarda rede Timor-Leste la antisipa ho di’ak, hodi  rezulta golu tan, muda score ba 2-0.

Maske sofre golu rua ona, maibé  la  hamate Ekipa Timor-Leste nia esperansa hodi kontinua kontrola bola, iha kampu laran hodi hatudu jogu ne’ebe di’ak no fantastiku, maske jogador ekipa Lafaek foin tuir eventu U-16 no jogador barak mak ladauk iha esperiénsia.

Ekipa Cabo-Verde nafatin domina bola liu husi estratejia no tatiku ne’ebé iha, tanba ne’e oportunidade monu ba nia  jogadór victór Monteiro ho numeru kamizola 15, dala ida hatama tan golu ba guarda rede Timor-Leste iha minutu 26.

Husi ne’e, Ekipa Timor-Leste nia mentalidade monu no la konsege hatudu jogu ne’ebé di’ak iha kampu laran no falta kontrolu bola, nune'e to’o primeiru parte termina ho score 3-0.

Hakat ba  jogu segunda,  Ekipa Cabo Verde nafatin domina bola iha kampu laran, liu husi bola ain-ba-ain, nune’e difikulta liu tan Timor Leste atu hetan bola.

Maske nune’e, Timor-Leste tenta buka meius oioin, maibe defeza Cabo-Verde sempre halo presaun iha liña oin halo avansadu Timor-Leste falla iha finalidade.

Husi esforsu hirak ne’e to’o iha minutu hetan oportunidade di’ak dala tolu, hodi sobu liña defeza Cabo-Verde nian, liu husi sutu ameasa ba Guarda rede, maibe seidauk rezulta golu ruma.

Ekipa Cabo-verde ne’ebé domina bola, konsege kria oportunidade barak ba jogadór avansadu, atu bele produs golu, ho oportunidade hirak ne’e iha  tempu adisional minutu 5, Ekipa Cabo-Verde hatama  tana golu, muda score ba 4-0, liu husi nia jogadór Lazard ho numeru kamizola 14.

Husi golu ne’e, sai  determinan ba jogu,  hodi Cabo-Verde rekolla hikas  pontu tolu, ekipa Timor-Leste pontu zero, iha tabele klasifikasaun.