Jenerál Reformadu hato’o kestaun ne’e, bainhira sai oradór prinsipál iha semináriu edukasaun sidadania boot ida ne’ebé hala’o iha Salaun Parókia Sagrado Coração de Jesus, Venilale.

Semináriu Organiza husi Konsellu Nasionál Juventude Timor-Leste (CNJTL-sigla inglés) ho apoiu husi Gabinete Apoiu Sosiedade Sivíl (GASC), eventu ne’e ho objetivu atu inspira estudante sira hodi simu responsabilidade nasionál. Jenerál Lere enfatiza katak, enkuantu jerasaun katuas sira asegura tiha ona Timor-Leste nia independénsia liuhusi sakrifísiu no luta, foinsa’e sira tenke proteje liberdade ne’e liuhusi edukasaun, disiplina, no partisipasaun sivika ne’ebé ativa.

Iha nia intervensaun, Jenerál Lere halo apelu forte ba foinsa’e sira atu fó balansu entre sira-nia direitu pesoál no kumprimentu dever nian ba Estadu. Nia fó avizu hasoru distrasaun husi era dijitál, hodi husu ba estudante sira atu fó prioridade ba estuda istória nasionál duké uza teknolojia ba de’it halimar.

"Se imi la hatene imi-nia istória, imi lakon imi-nia identidade," Jenerál ne’e hateten, hodi afirma katak komprensaun kle’an kona-ba funu rezisténsia nian importante tebes ba jerasaun foun sira atu bele defende no lidera nasaun ho di’ak ba futuru ne’ebé prósperu.

Autoridade lokál sira simu eventu ne’e ho laran haksolok, inklui Administradór Postu administrativu Venilale, José Freitas Boavida, ne’ebé louva Jenerál nia papél nu’udar mentór no figura aman nian ba komunidade.

Jenerál Lere konklui hodi fó hanoin ba estudante sira katak lideransa hahú husi fuan no sustenta husi espíritu servisu nian. Nia dezafia foinsa’e sira atu prepara an liuhusi servisu maka’as ho patriotizmu no kompromisu ho nasaun, hodi afirma katak Prezidénsia Repúblika kontinua komprometidu atu kapaasita jerasaun lider foun sira ne’ebé sei mantein valór husi Timor-Leste ida ne’ebé demokrátiku, soberanu no prósperu.