Primeriu Ministru hatete, sei jeneraliza asesu ba kuidadus  saúde ho kualidade, hodi haktuir didi'ak no beibeik kona-ba efisiénsia, transparénsia no profisionalizmu iha jestaun ba rekursus finanseirus, umanus, materiais no lojístikus, ba infraestruturas no ekipamentus.

Xefe Governu afirma, Governu sei garante imediata disponibilidade ba medikamentus ne'ebé  nesesárius iha óspitais no iha sentru saúde, hodi hala’o reforma ba jestaun no administrasaun iha setór  saúde, atu nune’e, iha futuro direitu fundamental kona-ba protesaun saúde ba sidadaun sira labele sai tan problema.

"Mellora nutrisaun infantil no liu mós husi merenda eskola ne’ebé nutritiva ba labarik sira hotu. Garante atu suku hotu-hotu, liuliu sira iha área remotas, bele hetan asesu ba Postu Saúde ida ho pakote de servisu ne'ebé  abrangente," dehan Primeiru Ministru iha Plenaria, iha Parlamentu Nasionál, Tersa (18/07).

Nia esplika, assegura atu sentru Saúde komunitáriu, iha Postu Administrativu, bele fó atendimentu ba ema moras ho número boot liu, hodi Kontinua hadi’a saúde materna no saúde infantil, liu husi polítika abranjentes, ne’ebé inklui kuidadu preventivu no integradu, hanesan iha kazu vasinasaun.

Governante afirma, Governu sei hadi’a no haluan prestasaun kuidadu médiku iha Óspital Nasional Gúido Valadares, iha especialidades oioin, ho  tan médiku no tékniku espesializadu, atu bele hahú halo tratamentu ba moras sira ne'ebé normalmente tenki ba estranjeiro.

"Reforma Laboratóriu Nasionál Saúde no Banku de Sangue atu bele hadi’a jestaun servisu nia iha laboratoriu no iha sistemas de fornesimentu tan," tenik PM

PM dehan, kona-ba infrastruturas, Governu sei kontinua harí no reabilita Postos de Saúde no mós hadi’a Sentros de Saúde Komunitários no óspitais referéncia, inklui infraestrutura ba apoiu ne'ebé  nesesária.

Aleinde, Xefe Governu dehan, sei kria mós óspital saúde psiquiátrika.