Tan ne'e, durante semana ida, hahú husi loron 11 to'o 16 Fulan-Jullu 2023 Autoriedade Protesaun Sivil rejistu komunidade nia uma ne'ebé hetan estragus husi dezastre naturais hamutuk 118 iha munisipiu Kalo (8) no ema ida lakon vida.

Diretór Gabineti Relasaun Externa no Komunikasaun Anacleto Caitano hatete, munisipiu Kalo ne'e mak Hanesan, Ainaro, Baukau, Bobonaro, Vikeke, Ermera Lautem, Manufahi no Rejiaun Administrativa Espesial Oekussi Ambeno (RAEOA).

"Semana ida ne'e, ami rejistu dezastre naturais ho tipo tolu, hanesan rai-halai, be sa'e, ahi-han uma no anin-boot, no husi tipo ne'e rai-halai hodi afeita ba komunidade nia mak aas liu," dehan Diretor iha Salaun APC Kaikoli Segunda (17/07).

Diretor afirma, rai-halai ho afeita ba komunidade sira nia iha Munisipiu Ainaro hamutuk 26, Manufahi 27 no Vikeke lima (5).Nia dehan, ahi-han komunidade nia uma iha munisipiu Ermera tolu (3), Baukau rua (2), Bobonaro ida (1) Ermera tolu (3).

Nune'e mós, akontese anin-boot ne'ebé akontese hodi estragus komunidade nia iha munispiu Baukau tolu (3), Bobonaro tolu (3), Vikeke tolu (3).

Enkuantu, udan-boot hodi rezulta be sa'e komunidade sira nia uma iha munisipiu Vikeke 35, Lautem haat (4) no Manufahi tolu (3). Anin-boot refere, rezulta mós estudante ida lakon vida tanba kauza husi ai-hanehan iha Aldeia Dahei, Suku Humboe, Posto Administrativu Ermera Munispiu Ermera.

Entertantu, dezastre Naturais ne'ebé akontese hahú husi Fulan-Janeiru to'o Jullu 2023 APS rejistu uma ne'ebé afetada hamutuk 1.970.

Enkuantu, husi uma hirak ne'e, APS halo fila-fali reverifikasaun hodi kategoriza uma hirak ne'e, no identifika ona uma hamutuk 1148,  ne'ebé kategori ba aat total hamutuk 413, aat naton 199 no aat kaman 536.

"Vitíma dezastre naturais ne'e ekipa APS husi Nasional no Munisipal hetan hotu ona apoiu emerjensia no tempo badak sei apoiu tan rekoperasaun ba vitíma sira ne'ebé identifika ona," dehan nia.