Nia dehan, kazu hirak ne'e INDDICA haruka ona ba Ministeriu Públiku no organizasaun sira ne’ebé fó asistensia ba violasaun hasrou labarik sira, hanesan, ALFeLa, Polisia VPU.
“Husi kazu 16 ne'ebé rejistu ne'e, vítima minoridade hotu, ho tipo kazu abuzu seksual, violensia fíziku no balun psikologiku. Husi númeru ne’e balun INDDICA resolve ona,” dehan nia, iha Sala Enkontru INDDICA, Kaikoli, Kinta (19/10).
Nia hatutan, husi dadus hirak ne'e, maioria husi Kapital Dili no mós mai husi munisipiu seluk iha kazu tolu.
Nia haktuir, bainhira kazu hirak ne’e akontese, INDDICA halo intervensaun direita, hafoin prefere fali ba instituisaun relevante sira.
"Kazu ne'e ami atende direita ne'ebé kategori hanesan issu krítiku, ezemplo hanesan soe bebe ami tenki tun lalais hodi halo intervensaun hafoin prefere fali ba instituisaun relevante ne'ebé presiza halo atendimentu," hakotu nia.
Entretantu, rekorda katak, Parlamentu Nasional (PN) liu husi Prezidente Komisaun F, Maria Barreto, mós husu ba Governu liuhusi Ministeriu Solidariedade Sosial no Inkluzaun (MSSI) atu iha obrigasaun responsavel hodi proteje labarik sira iha abuzu no konfiltu nia laran tuir lei protesaun labarik ne'ebé aplikavel iha Timor-leste.
