Diretór Jeral Pre-eskola, Ensinu Baziku no Ensinu Rekorente, Apolinário Serpa Rosa informa, parte MEJD foti ona desizaun hodi suspende atividade iha EBF ida iha Bemori, Dili, tanba identifika inan husi estudante na’in 2 pozitivu Covid-19.
“Iha munisipiu Dili ita sei hapara atividade eskola nian ba iha EBF Doque de Caixias Bemori, tanba durante ne’e ita-nia Ministériu Saúde sira identifika ona inan husi estudante na'in rua pozitivu Covid-19,” informa Apolinario iha nia knar-fatin, Vila Verde, Tersa (16/02).
Nia dehan, inan husi estudante na’in rua ne’e ba Atambua liu husi dalan legal hodi halo lia, no bainhira fila mai no halo teste identifika pozitivu Covid-19.
Daudaun ne’e, Apolinario hatete, inan ne’ebé pozitivu Covid-19 iha ona sala izolamentu Vera Kruz no estudante na'in rua ho sira-nia aman, inklui alin kiik-oan ida, ekipa vizilansia Ministeriu Saude asegura ona iha kuarentena atu halo observasaun durante loron 14.
Nia hatutan, MEJD sei hein rezultadu laboratoriu husi MS kona-ba estudante na'in rua ne’ebé iha kuarentena, bainhira rezultadu pozitivu MEJD sei foti desizaun hodi taka total atividade eskola nian.
Iha fatin hanesan, Diretor Edukasaun Munisipiu Dili Duarte Braganza afirma, provizoriamente sei suspende prosesu aprendizajen iha EBF Doque de Caixias hahú iha 16 Fevreiru 2021.
“Iha eskola labarik barak, ho nune’e ita tenke taka provizoria lai atu nune’e ita bele haree lai teste ne’e oinsa, karik teste ne’e mak pozitivu, entaun ita sei taka total atividade eskola nian hodi bele prevene labarik sira husi moras ne’e,” dehan nia.
