Bandu deslokasaun ba-mai Munisipiu rua ne’e tanba konsidera kazu númeru pozitivu aumenta ne’e maioria deteta husi sidadaun sira-ne’ebé tama ilegalmente husi Munisípiu sira refere.

Ministru Prezidénsia Konsellu Ministru, Fidélis Magalhães hateten, medidas serka sanitária ida-ne’e, sei limita viazen sidadaun husi Munisípiu rua ne’e ba munisípiu seluk, no munisípiu seluk ba munisípiu rua ne’e.

“Aprovasaun ba impozosaun ba serka sanitária ba munisípiu Bobonaru no munisípiu Covalima, tanba númeru ilegál ne’ebé tama, no foin lalais ne’e hirak ne’ebé tama ilegál subar de’it, ate ariska ema barak nia vida liu-liu iha munisípiu Bobonaru iha zona Hauba, Zona Marobo no Zona Lourba,”dehan Ministru Fidélis, Segunda (15/02) hafoin remata enkontru Konsellu Ministru Extra-ordináriu iha Palásiu Governu.

Medidas serka sanitária ne’e mós, banku movimentu transporte públiku husi munisípiu seluk ba munisípiu Covalima ho Bobonaru, maibé loke de’it ba lori nesessidade urjente, sasán umanitária.

“Hafoin publikasaun ida-ne’e, loron ida antes, movimentasaun ema nian ba tama no sai husi munisípiu rua sei para hotu, bis sira, transporte sira ba mai husi munisípiu seluk ba munisípiu rua sei para hotu, no husi munisípiu refere atu mai Dili mós sei taka hotu,” dehan nia.

Tan ne’e, nia esplika rezolusaun serka sanitária ne’e, publika ona iha jornál Repúblika, sei tama iha envigór iha aban (16/2) no retama iha tuku 11;59 dia 3 Marsu 2021, bazeia deklarasaun estadu emerjénsia atuál inklui sidadaun real iha baze.

Bainhira laiha tranzisaun lokál iha munisípiu rua ne’e maka, governu sei halo mamar fali medida sira-ne’e.

Ne’e duni, nia husu sidadaun husi Munisípiu rua ne’e atu tur hakmatek iha fatin, no kopera ho autoridade lokál atu evita vírus Covid-19 importa mai Timor-Leste hodi fó rísku ba ema-nia vida.

Kona-ba atividade eskola nian, Fidélis Magalhães afirma, Ministru Edukasaun Juventude Desportu, mak sei hasai despaixu ida atu bele suspende atividade eskola nian.