Maske prizaun ne’e sai nu’udar fatin atu kastigu ema, maibé, prizioneiru sira mós iha direitu atu bele hetan aihan no hemun ne’ebé saudavel.

Preokupasaun ne’e hato’o direitamente husi prizioneiru sira ba Vise Ministru Justisa José Edmundo ne’ebé vizita Prizaun Bekora.

Bainhira Vise MJ ne’e vizita prizaun Bekora, prizioneiru sira hatete katak, durante ne’e lorloron sira hemu bee foer ne’ebé fó impaktu tebes ba sira-nia saude.

Ho nune’e, sira husu ba Vise MJ atu ba futuru kanaliza bee-moos ba prizaun Bekora.

Ba preokupasaun husi prizioneiru sira, Edmundo dehan, nia parte hato’o ona karta ba SAS no marka ona audensia ho Ministru Obras Publika Salvador Pires atu koalia kona-ba kanalizasaun bee-moos ba prizaun Bekora.

“Ba futuru ita sei tau kanalizasaun (bee-moos) ida iha ne’e,” dehan Edmundo ba jornalista sira iha prizaun Bekora, Kuarta (29/07).

PS 3 no SSK 1, Sosa Bee-moos

Entretantu, Postu Saúde (PS) 3 no Sentru Saúde Komunitariu (SSK) ida iha Serbisu Saúde Munisípiu (SSM) Dili nia mahon mak to’o ohin loron la asesu bee-moos, ho difikuldade ne’e, sira tenke sosa de’it bee-moos.

Diretora Saúde Munisípiu Dili Agustina Seguradu hatete, iha SSM Dili, Postu Saúde 3 no Sentru Saúde Komunitariu 1 mak la asesu ba bee-moos.

Postu Saude ne’ebé la asesu bee-moos mak PS Manleuana, PS Lemkari, PS Lahane Osidental, no SSK ne’ebé la asesu bee-moos mak SSK Bekora.

Durante ne’e, nia hatete, fasilidade saúde 4 ne’e mak sosa bee-moos de’it hodi fase ekipamentus mediku no ba nesesidade baziku sira.

“Alternativa ne’ebé mak SSM Dili halo ne’e mak uza kustu operasional sosa bee no koordena mós ho saneamentu munisípiu Dili fornese bee-moos semana 1 dala rua iha tempu Covid-19 nian ne’e,” dehan Agustina.

Entretantu, SSM Dili iha SSK 6, PS 19, no postu 5 mak uza fasilidade suku nian hodi halo atendimentu ba pasiente sira.