Responsavel Dioseze Dili, Padre Paulus Maia informa katak,  Igreja Katolika nunka taka dalan ba vitima violasaun sexual husi invadór sira iha tempu okupasaun Indonesia no Japanes atu hetan sira nia direitu ba sertidaun baptismu.

"Klaru katak vitima husi violasaun sexual akontese dala barak iha tempu kolonialismu Indonesia no Japaun, no sira barak mak ate agora laiha sertidaun baptismu maibé sira tenke hakbesik ba Igreja Katolika hodi tuir prosesu ne’ebé implementa ba sarani katoliku hot-hotu iha Timor-Leste,"dehan Amu Paulus klarifika, relasionadu dadus Assosiasaun Chega ba Ita (Acbit) hatudu katak iha Munisipiu Vikeke Kraras identifika oan husi vitima violasaun sexual na’in 7 no na’in 2 husi Munisipiu Baucau to’o agora seidauk hetan sertidaun baptismu.

Acbit hato'o ona ba parte Igreja Katolika maibé seidauk iha solusaun.

Tanba ne’e, bainhira jornalista online INDEPENDENTE hasoru Amu Paulus iha nia knar fatin Lecidere, nia esplika katak maski oan sira husi vitima violasaun sexual laiha aman, maibé Igreja garante nafatin atu hetan direitu ba sertidaun baptismu liu husi kriteriu sira ne’ebé Igreja define.

“Kontestu ida ne'e di’ak liu inan husi oan sira ne’e bele fó asentuasaun ne'e hanesan vitama ka la vitima tanba ida ne’e por konsensia ba sira nia relasaun, ne'e laos violasaun relasaun sexual entre javenes sira maibé ita konsidera katak tanba entre sira na’in rua hakarak malu antaun ikus mai labarik sira ne’e moris,”dehan Amu ne’e.

Ho kazu hirak ne’e, tuir Amu la susar ba oan sira atu hetan sertidaun babtismu maibé tenke hakbesik ba Igreja hodi priense rekizitu sira.

Ezemplu, se nia labarik kikoan ida karik inan aman tenke lori sira ba tau naran rejistu iha parokia ne’ebé sira pertense ba no inan aman no aman no inan sarani sira mak sei tuir doutrina iha Igreja nian hodi hein desizaun Parokia nian atu nune’e bele hetan sarani no ikus mai bele hetan sertidaun baptismu, maibé tanba vitima violasaun sexual sira nia oan agora ema idade ona entre tinan 10-20 ba leten iha obrigasaun atu ba tau naran hodi kumpri rekezitu husi Igreja nian.

"Kazu aman laiha tanba aman agora buka tuir la hetan no agora iha Indonesia hela ne’e laos kestaun, importante mak vitama husi relasaun violasaun sexual liliu inan tenke kompleta nia naran kompletu, nia inan-aman nia naran nomos avo husi nia inan tenke kompletu, se nia aman laiha duni tau iha neba aman deskoñesidu termus portuges dehan Incógnito (penyamaran) ida ne’e katak sira lahatene aman se,"Amu esplika.

Tuir Amu dehan, priense ona rekizitu sira hodi hetan sakramentu baptismu, bele mós kontinua hetan primeira kuminiaun karik oan sira boot ona. Aliende ne’e iha dever mós hetan tan Sakramentu Krisma.