Liu husi komunikadu ne’ebé fo sai husi Sekretariadu Ekleziastika, iha Arquidiosese Metropolitano Dili, ohin (6/3) katak, atividade preparasaun ba konfesaun ba festa paskoa parokia no Igreja nian tenke suspende hotu.

“Temporariamente suspende Konfesaun jeral ou konfesaun ne’ebė envolve ema barak, liu-liu iha tempu Kuaresma nudar preparação ba Festa Páskoa. Iha karik melhoramentu mak sei komunika fali”, haktuir komunikadu, iha loron sabadu (06/03/2021).

Nota komunikadu ne’e haktuir, ba situasaun atual enjeral iha Timor-Leste liga ba Estadu Emergénsia (EE) ba dala sanulu resin ida (XI), no hahu ona transmisaun lokál iha Suai no Baucau ne’ebé fó sai ona liu husi Sentru Integradu Jestão de Krise ne’ebé ita hotu akompana.

Nune’e, Archebispo de Díli, Dom Virgilho do Carmo da Silva, SDB, komunika ona ba padre parokia sira iha teritóriu tomak.

1. Amu Pároku sira atu koordena nafatin ho parte seguransa (PNTL) no Saúde (Municipio no Postu Administrativu) atu atualiza informasaun sira kona ba COV.SARS.2, no wainhira husi parte saúde identifika karik COV.SARS.2, iha ita bo’ot sira nia fatin, husu atu imediatamente foti medida ne’ebė séria ho konesimentu Amu Bispu nian.

2. Atu Amu Pároku sira multiplika ka habarak Missa Dominikal iha lgreja Paroquial hodi nune e, bele evita partisipasaun sarani nian ho quantidade bo’ot iha Missa.

3. Atu desinfekta nafatin Igreja Parokial no Kapela sira no nafatin halo tuir orientagaun sira, Ministério da Saúde no OMS nian (fase limam, usa máscara, no distanciamento social).

4. Atu temporariamente suspende confessão geral ou confessão ne’ebė envolve ema barak, liu-liu iha tempu Kuaresma nudar preparasaun ba Festa Páskoa. Iha karik meloramentu mak sei komunika fali.

5. Atu evita reuniaun sira ne’ebé la nesessáriu no envolve ema barak.
6. Atu enkoraja nafatin sarani sira la bele kaer liman, bensa liman, hakuak malun no rei malun antes, durante no depois de Missa.
Dadus atual pasiente Covid-19 hamutuk 25. Husi total ne'e hala'o hela tratamentu iha sala izolamentu vera crus Dili.